پاکستان اور ایران کی قومی کبڈی ٹیموں کے مشترکہ تربیتی کیمپ کا دوسرا روز بھی بھرپور سرگرمیوں کے ساتھ جاری رہا۔ کھلاڑیوں نے جدید تکنیک، دفاعی و جارحانہ حکمتِ عملی اور مسابقتی کھیل پر توجہ دی۔
مشترکہ تربیت کا مقصد جاپان میں ہونے والے 20ویں ایشین گیمز 2026 کے لیے پاکستانی ٹیم کی تیاریوں کو مزید مؤثر بنانا ہے۔
پاکستان اولمپک ایسوسی ایشن کے سیکریٹری جنرل خالد محمود نے تربیتی کیمپ کا دورہ کیا اور کھلاڑیوں، کوچنگ اسٹاف اور آفیشلز سے ملاقات کی۔ انہوں نے قومی ٹیم کی تیاریوں اور کھلاڑیوں کی محنت کو سراہا۔
پاکستان کبڈی فیڈریشن کے مطابق ایران کی مضبوط ٹیم کے ساتھ تربیت سے پاکستانی کھلاڑیوں کو بین الاقوامی معیار کا تجربہ حاصل ہو رہا ہے جو ایشین گیمز میں بہتر کارکردگی کے لیے اہم ثابت ہوگا۔