قراقرم کے پہاڑی سلسلہ میں واقع اسپانتک چوٹی پر جاں بحق ہونے والی ڈاکٹر اسماء کی میت کی بیس کیمپ منتقلی کا آپریشن شدید خراب موسم کے باعث عارضی طور پر روک دیا گیا ہے۔
وفاقی وزیر اطلاعات و نشریات عطا اللہ تارڑ کے مطابق ہائی ایلٹیٹیوڈ پورٹرز کو میت کی منتقلی کے لیے کیمپ 3 تک پہنچنا تھا اور تمام کارروائی کل تک مکمل کی جانی تھی۔ تاہم شدید برف باری، تیز ہواؤں اور نامساعد موسمی حالات کے باعث کیمپ 3 کے انتہائی قریب پہنچنے کے باوجود ریسکیو ٹیم کو پیش رفت روک کر واپس کیمپ 2 منتقل ہونا پڑا۔
ریسکیو آپریشن کو تیز کرنے اور ممکنہ متبادل راستے اختیار کرنے کے لیے گلگت بلتستان حکومت اور فورس کمانڈر ناردرن ایریاز (FCNA) کے درمیان رابطہ قائم کر کے ہیلی کاپٹر سروس کو ہائی الرٹ کر دیا گیا ہے۔ انتظامیہ کی جانب سے تمام دستیاب وسائل اور متبادل انتظامات بروئے کار لائے جا رہے ہیں۔
وزیر اعظم شہباز شریف کو ریسکیو آپریشن کی تازہ ترین صورتحال سے مسلسل آگاہ رکھا جا رہا ہے۔