پاکستان ویمن کرکٹ ٹیم کی کپتان فاطمہ ثنا نے ویمنز ایشیا کپ سے قبل مداحوں سے گفتگو کرتے ہوئے قومی ٹیم کے بھرپور اعتماد کا اظہار کیا ہے۔
انہوں نے کہا کہ یہ ٹورنامنٹ ٹیم کے لیے ایک نیا اور بہترین موقع ہے جہاں کھلاڑیوں کی تیاری بہت اچھی ہے اور تربیتی کیمپ کے دوران کئی اہم شعبوں پر خصوصی کام کیا گیا ہے تاکہ میدان میں بہترین کرکٹ کا مظاہرہ کیا جاسکے۔
فاطمہ ثنا کا کہنا تھا کہ وہ یہاں کی مقامی کنڈیشنز سے اچھی طرح واقف ہیں کیونکہ ٹیم کافی عرصے سے یہاں کھیل رہی ہے اور ان حالات کی عادی ہوچکی ہے۔
انہوں نے مزید کہا کہ یہاں کی پچز اسپنرز کے لیے مددگار ثابت ہوتی ہیں اور چونکہ قومی ٹیم کی اسپنرز پہلے ہی بہترین فارم میں ہیں، اس لیے ٹیم کو اس کا پورا فائدہ ہوگا۔
انہوں نے کھلاڑیوں کو اپنے پوٹینشل کے مطابق کھیلنے، خود کو ثابت کرنے اور کھیل سے لطف اندوز ہونے کا مشورہ دیتے ہوئے مداحوں سے بھی اپیل کی کہ وہ اسٹیڈیم آکر ٹیم کی بھرپور حوصلہ افزائی کریں۔