وفاقی وزیر صحت مصطفیٰ کمال نے سینیٹ اجلاس میں ملک کے نظامِ صحت پر سخت تشویش کا اظہار کرتے ہوئے کہا ہے کہ ملکی نظام گل سڑ گیا ہے، پاکستان میں روزانہ 1300 بچے جاں بحق ہورہے ہیں آئیں مل بیٹھ کر انہیں بچائیں۔
سینیٹ میں اظہارِ خیال کرتے ہوئے مصطفیٰ کمال نے کہا کہ وزیراعظم کی قائم کردہ کمیٹی کی رپورٹ آج رات سامنے آجائے گی رپورٹ دیکھ کر بتایا جائے کہ اس میں کیا سقم رہ گیا ہے۔ وزیراعظم سمیت کسی کی نیت نہیں کہ پمز سانحے میں ملوث کسی بھی شخص کو بچایا جائے۔
انہوں نے اپوزیشن کو مخاطب کرتے ہوئے کہا کہ ایک آدمی کو بھی نہیں چھوڑا جائے گا چاہے کتنا ہی بڑا ترم خان ہو تمام ذمہ داروں کے خلاف کارروائی ہوگی۔ انہوں نے اپوزیشن سے کہا کہ حکومت کو گائیڈ کریں اور ذمہ داروں کے خلاف کارروائی کے لیے روڈ میپ دیں۔
وفاقی وزیر نے کہا کہ تمام متعلقہ افسران کو لائن حاضر کیا جائے گا اور کسی رکن اسمبلی یا سینیٹر کی جانب سے کسی افسر کو بچانے کے لیے فون برداشت نہیں کیا جائے گا۔ ان کا کہنا تھا کہ وزارتوں کے لیے اپنی قبریں خراب نہیں کریں گے۔
مصطفیٰ کمال نے پمز سانحے کا ذکر کرتے ہوئے کہا کہ واقعے میں 15 بچے جاں بحق ہوئے جبکہ ایک بچے کو اسپتال کے عملے نے بچایا۔ انہوں نے کہا کہ وہ وزیر صحت ہیں اور خود کو بھی اس معاملے میں ذمہ دار سمجھتے ہیں اسی لیے خود کو احتساب کے لیے پیش کیا ہے۔
انہوں نے اپوزیشن سے مطالبہ کیا کہ وہ بھی تحقیقات میں شامل ہو اور کمیٹی بنائے تاہم تحقیقات کو طویل کرنے کے بجائے جلد مکمل کیا جائے۔
وفاقی وزیر صحت نے کہا کہ پاکستان میں صحت کے شعبے کی صورتحال مثالی نہیں ملک بھر میں روزانہ بڑی تعداد میں بچے جاں بحق ہورہے ہیں۔ ان کے مطابق بچوں کی جانیں بچائی جاسکتی ہیں اس لیے معاملے کو صرف تاریخوں اور کمیٹیوں تک محدود نہیں کرنا چاہیے۔
مصطفیٰ کمال نے کہا کہ پمز سانحہ کسی صورت دبنا نہیں چاہیے اور حکومت و اپوزیشن کو مل کر ایسا نظام بنانا ہوگا جس سے مستقبل میں بچوں کی جانیں محفوظ بنائی جاسکیں۔