بلوچستان کے اضلاع چاغی اور پشین میں سیکیورٹی فورسز نے مختلف کارروائیوں کے دوران 21 دہشت گردوں کو ہلاک کردیا جبکہ فائرنگ کے تبادلے میں دو افسران اور کسٹمز کے ایک اہلکار سمیت 6 بہادر اہلکار شہید ہوگئے۔
آئی ایس پی آر کے مطابق 31 اگست اور یکم ستمبر کی درمیانی شب نوکچا، ضلع چاغی اور زیارت کراس، ضلع پشین میں دہشت گردوں کے خلاف کارروائیاں کی گئیں۔
چاغی میں فتنہ الہندوستان سے وابستہ دہشت گرد این-40 کوئٹہ تفتان شاہراہ پر بھتہ خوری کے لیے غیر قانونی ناکہ قائم کرنے کی کوشش کر رہے تھے جس پر سیکیورٹی فورسز نے فوری کارروائی کرتے ہوئے 11 دہشت گردوں کو ہلاک کردیا۔ دہشت گردوں سے بھاری تعداد میں اسلحہ، گولہ بارود اور دھماکا خیز مواد بھی برآمد ہوا۔
دوسری کارروائی میں فتنہ الخوارج سے تعلق رکھنے والے دہشت گردوں نے کسٹمز ہاؤس میں داخل ہونے کی کوشش کی تاہم سیکیورٹی فورسز نے مؤثر جواب دیتے ہوئے 10 دہشت گردوں کو ہلاک کردیا جبکہ فرار ہونے والے دہشت گردوں کو بھی نشانہ بنایا گیا۔
آئی ایس پی آر کے مطابق کارروائی کے دوران 6 اہلکاروں نے وطن کے دفاع میں جام شہادت نوش کیا جن میں دو افسران اور محکمہ کسٹمز کا ایک سرکاری اہلکار بھی شامل ہے۔
علاقے میں باقی دہشت گردوں کے خاتمے اور قومی شاہراہوں و مقامی آبادی کے تحفظ کے لیے کلیئرنس اور سینیٹائزیشن آپریشن جاری ہے۔ آئی ایس پی آر نے کہا ہے کہ دہشت گردی کے مکمل خاتمے تک کارروائیاں پوری قوت اور عزم کے ساتھ جاری رہیں گی۔