انڈونیشیا میں ماؤنٹ اناک کراکاٹو کے دوبارہ پھٹنے کے بعد کئی علاقوں میں صورتحال متاثر ہوگئی ہے۔ آتش فشاں سے بڑی مقدار میں راکھ اور دھواں فضا میں بلند ہوا، جس کے باعث فضائی سفر، تعلیمی سرگرمیوں اور روزمرہ زندگی پر اثر پڑا۔
حکام کے مطابق آتش فشاں سے اٹھنے والا راکھ کا بادل تقریباً 15 کلومیٹر کی بلندی تک پہنچ گیا جبکہ پھٹنے کے بعد لاوا بھی باہر نکلتا رہا۔ قریبی علاقوں میں دھماکوں جیسی آوازیں اور زمین میں ارتعاش محسوس کیے جانے کی اطلاعات بھی سامنے آئیں۔
فضا میں پھیلنے والی آتش فشانی راکھ کے باعث حکام نے احتیاطی اقدامات کرتے ہوئے جکارتا ایئرپورٹ سمیت 8 ہوائی اڈوں پر پروازیں معطل کر دیں۔ گزشتہ دو روز کے دوران 712 سے زائد پروازیں متاثر ہوئیں جس کے نتیجے میں ایک لاکھ 50 ہزار سے زیادہ مسافروں کو مشکلات کا سامنا کرنا پڑا۔
راکھ کے بادل جاوا اور سماٹرا کی سمت بھی پھیل گئے ہیں جس کے باعث فضائی حدود اور ایوی ایشن سروسز پر خصوصی نظر رکھی جا رہی ہے۔ بعض متاثرہ علاقوں میں احتیاطاً اسکول بھی بند کر دیے گئے ہیں۔
آتش فشانی راکھ اور فضائی آلودگی کے باعث بعض شہریوں نے آنکھوں میں جلن اور سانس لینے میں دشواری کی شکایت کی ہے۔ حکام نے متاثرہ علاقوں کے رہائشیوں کو غیر ضروری طور پر باہر نہ نکلنے اور حفاظتی ہدایات پر عمل کرنے کا مشورہ دیا ہے۔
انڈونیشین جیولوجیکل ایجنسی کا کہنا ہے کہ فی الحال کسی بڑے سونامی کا خطرہ ظاہر نہیں کیا گیا، تاہم آتش فشانی سرگرمی اور اس کے ممکنہ اثرات پر مسلسل نگرانی جاری ہے۔