سعودی عرب کی اہم ایسٹ ویسٹ آئل پائپ لائن کی بندش اور توانائی کے بنیادی ڈھانچے پر حالیہ حملوں نے عالمی تیل مارکیٹ میں ایک بار پھر بے چینی پیدا کردی ہے، جس کے نتیجے میں خام تیل کی قیمتوں میں اضافہ دیکھا گیا۔
رائٹرز کے مطابق منگل کو برینٹ خام تیل کی قیمت 1.37 ڈالر یعنی 1.3 فیصد بڑھ کر 107.05 ڈالر فی بیرل ہوگئی جبکہ امریکی ویسٹ ٹیکساس انٹرمیڈیٹ (WTI) بھی 1.53 ڈالر یعنی 1.51 فیصد اضافے کے بعد 102.92 ڈالر فی بیرل پر پہنچ گیا۔
دونوں عالمی بینچ مارک اس سے ایک روز قبل بھی ایک فیصد سے زیادہ مہنگے ہوئے تھے۔ سعودی توانائی کے انفرااسٹرکچر کو نقصان پہنچنے اور ایسٹ ویسٹ پائپ لائن کی بندش نے عالمی سطح پر خام تیل کی دستیابی سے متعلق خدشات کو مزید بڑھا دیا ہے۔
خلیجی خطے میں بحری نقل و حرکت کو محفوظ بنانے کے لیے سفارتی کوششیں جاری ہیں، تاہم تازہ حملوں کے باعث سرمایہ کار اب بھی محتاط ہیں۔ ماہرین کے مطابق اگر تیل کی سپلائی متاثر ہونے کا سلسلہ طویل ہوا تو عالمی مارکیٹ میں قیمتیں مزید بڑھنے کا دباؤ برقرار رہ سکتا ہے۔