گورنر خیبر پختونخوا فیصل کریم کنڈی نے کہا ہے کہ صوبے میں پائیدار امن کا قیام حکومت کی اولین ترجیح ہے، دہشت گردی کے خلاف کسی قسم کی رعایت نہیں برتی جائے گی اور اس ناسور کا مقابلہ سنجیدہ اقدامات اور واضح حکمت عملی کے تحت کرنا ہوگا۔
فیصل کریم کنڈی نے کہا کہ امن کے قیام کے سوا ہمارے پاس کوئی دوسرا راستہ نہیں، صوبے میں امن و امان کی صورتحال بہتر بنانے کے لیے تمام تر کوششیں کرنا ہوں گی۔
گورنر خیبر پختونخوا کا کہنا تھا کہ دہشت گردی کے خلاف جنگ میں جانوں کا نذرانہ پیش کرنے والے شہداء کے خاندانوں کو ان کے حقوق بروقت فراہم کرنا چاہتے ہیں۔
انہوں نے کہا کہ پہلے صوبے میں امن قائم کیا جائے گا، جس کے بعد ترقیاتی عمل کو آگے بڑھاتے ہوئے صوبے میں ترقی کا جال بچھایا جائے گا۔