پشاور کے علاقے دیر کالونی میں نجی اسکول کی چھت گرنے کے افسوسناک واقعے نے کئی خاندانوں کو غم میں مبتلا کر دیا۔ حادثے میں ایک ہی خاندان کے تین بچوں کی اموات کی خبر سامنے آئی ہے جبکہ دوسری جماعت کا طالب علم عماد بھی جاں بحق ہوگیا تاہم اس کی بہن کو ملبے سے زندہ نکال لیا گیا۔
متوفی بچوں کے چچا نے بتایا کہ ان کے گھر کے تین بچے حادثے کا شکار ہوئے جن میں سے دو کی لاشیں مل چکی ہیں جبکہ تیسرے کی تلاش جاری ہے۔ ان کا کہنا تھا کہ علاقے کے کئی بچے بھی لاپتہ ہیں۔ انہوں نے حکام سے مطالبہ کیا کہ اسکول کے مالک کے خلاف فوری اور سخت قانونی کارروائی کی جائے۔
دوسری جانب حادثے میں جاں بحق ہونے والے کمسن عماد کے والد نے بتایا کہ وہ صبح اپنے بچوں کو اسکول بھیج کر کام پر چلے گئے تھے، جہاں انہیں گھر سے فون آیا کہ اسکول کی چھت گر گئی ہے۔
والد کے مطابق عماد دوسری جماعت میں پڑھتا تھا جبکہ اس کی بہن تیسری جماعت کی طالبہ ہے۔ حادثے کے دوران دونوں بچے اسکول میں موجود تھے، تاہم خوش قسمتی سے ان کی بیٹی کو ملبے کے نیچے سے زندہ نکال لیا گیا جبکہ عماد جانبر نہ ہوسکا۔
بیٹے کی اچانک موت پر والدین شدید صدمے میں ہیں اور اہل خانہ غم سے نڈھال ہیں۔ متاثرہ خاندانوں نے واقعے کی شفاف تحقیقات اور ذمہ داروں کے خلاف قانونی کارروائی کا مطالبہ کیا ہے۔