اسلام آباد کے مختلف علاقوں میں گیس کی مین پائپ لائن میں لیکیج کی مرمت کے باعث گیس کی فراہمی عارضی طور پر معطل رہے گی۔ سوئی ناردرن گیس پائپ لائنز لمیٹڈ نے متاثرہ علاقوں اور گیس کی بندش کے اوقات کار سے متعلق اعلامیہ جاری کردیا ہے۔
سوئی ناردرن کے مطابق غوری ٹاؤن، فیض آباد بائی پاس روڈ، ہائی اسٹیٹ روڈ (کھنہ پل سے بارہ موڑ تک)، سوان گاؤں، گلبرگ ٹاؤن، شکریال، رحمن گارڈن، برما ٹاؤن، گارڈن ٹاؤن اور ملحقہ علاقوں میں گیس کی فراہمی پیر 19 اکتوبر کی رات 9 بجے سے منگل 20 اکتوبر کی صبح 6 بجے تک معطل رہے گی۔
اعلامیے کے مطابق اسلام آباد کے سیکٹر جی سیون، بلیو ایریا اور ان کے ملحقہ علاقوں میں بھی گیس کی عارضی بندش ہوگی۔ ان علاقوں میں پیر 19 اکتوبر کی رات 10 بجے سے منگل 20 اکتوبر کی صبح 6 بجے تک گیس فراہم نہیں کی جائے گی۔
سوئی ناردرن نے متاثرہ علاقوں کے صارفین کو ہدایت کی ہے کہ وہ گیس کی بندش کے دوران ممکنہ مشکلات سے بچنے کے لیے پہلے سے متبادل انتظامات کرلیں۔
گیس کمپنی نے مزید ہدایت کی ہے کہ فراہمی معطل ہونے کے دوران گیس کے تمام آلات بند رکھے جائیں تاکہ گیس کی بحالی کے وقت کسی ممکنہ حادثے سے بچا جاسکے۔