پاکستان کرکٹ بورڈ نے اوپننگ بیٹر صائم ایوب کی درخواست پر انہیں اسکواڈ سے ریلیز کر کے صاحبزادہ فرحان کو طلب کرلیا ہے۔
پی سی بی کے مطابق صائم ایوب نے ڈومیسٹک کرکٹ میں اپنی بیٹنگ پر کام کرنے کے لیے اسکواڈ سے الگ ہونے کی خواہش ظاہر کی تھی، جسے پاکستان ٹیم مینجمنٹ اور سلیکشن کمیٹی نے باہمی مشاورت کے بعد منظور کرلیا۔ بورڈ نے صائم ایوب کی موجودہ فارم کو مدنظر رکھتے ہوئے ان کے اس فیصلے کی تعریف کی ہے۔
صائم ایوب کی جگہ ٹیم میں شامل کیے گئے صاحبزادہ فرحان اس وقت نیپال پریمیئر لیگ میں شرکت کے لیے کھٹمنڈو میں موجود ہیں اور نیشنل ڈیوٹی کے لیے طلب کیے جانے پر وہ پہلی دستیاب فلائٹ سے وطن واپس پہنچ کر جلد اسکواڈ کو جوائن کریں گے۔
مسلسل تین فتوحات کے ساتھ فائنل میں جگہ بنانے والی پاکستان ٹیم تین ملکی سیریز کے پانچویں میچ میں منگل کو قذافی اسٹیڈیم لاہور میں سری لنکا کے مدِ مقابل آئے گی۔