پاکستان اسٹاک ایکسچینج میں اسٹیٹ بینک کی جانب سے پالیسی ریٹ میں 50 بیسس پوائنٹس اضافے کے فیصلے کے بعد خریداری کا رجحان دیکھنے میں آیا جس کے نتیجے میں کاروبار کے ابتدائی منٹوں میں بینچ مارک کے ایس ای 100 انڈیکس میں 950 سے زائد پوائنٹس کا اضافہ ریکارڈ کیا گیا۔
کاروباری سیشن کے دوران صبح 10 بج کر 5 منٹ پر کے ایس ای 100 انڈیکس 959.08 پوائنٹس یا 0.59 فیصد اضافے کے ساتھ 163,997.54 پوائنٹس پر پہنچ گیا۔ سیمنٹ، کمرشل بینکوں، تیل و گیس کی تلاش کرنے والی کمپنیوں اور آئل مارکیٹنگ کمپنیوں سمیت اہم شعبوں کے حصص میں خریداری دیکھی گئی۔
یاد رہے کہ گزشتہ کاروباری روز پیر کو بھی پاکستان اسٹاک ایکسچینج میں اتار چڑھاؤ کے باوجود بحالی کا رجحان رہا تھا۔ اسٹیٹ بینک کی مانیٹری پالیسی کمیٹی کے فیصلے سے قبل سرمایہ کار پالیسی ریٹ میں متوقع اضافے کے پیشِ نظر محتاط انداز میں سرمایہ کاری کرتے رہے۔پیر کو کاروبار کے اختتام پر کے ایس ای 100 انڈیکس 663.59 پوائنٹس یا 0.41 فیصد اضافے کے ساتھ 163,038.47 پوائنٹس پر بند ہوا تھا۔