بھارت میں ایک کاروباری شخصیت نے اپنے 15 سالہ بیٹے کی تعلیمی کامیابی پر ایسا قیمتی تحفہ دیا کہ اس کی خبر سوشل میڈیا پر توجہ کا مرکز بن گئی۔ والد نے نویں جماعت کے امتحانات میں اچھی کارکردگی دکھانے والے بیٹے کو 2 کروڑ 30 لاکھ بھارتی روپے مالیت کی لگژری گاڑی دے دی۔
بھارتی میڈیا کے مطابق مغربی بنگال کے ضلع مشرقی بردوان کے رہائشی شمس الدین مدیا نے اپنے بیٹے محمد طلحہ کے لیے BMW M4 کمپیٹیشن خریدی۔ طلحہ نے حالیہ ششماہی امتحانات میں اچھے نمبر حاصل کیے تھے اور وہ کافی عرصے سے اس گاڑی کو خریدنے کی خواہش رکھتا تھا۔
بیٹے کی پسند پوری کرنے کے لیے شمس الدین خصوصی طور پر ممبئی گئے، جہاں سے گاڑی خرید کر ایک کنٹینر کے ذریعے اپنے آبائی علاقے منگوائی گئی۔
تاہم طلحہ کو اس مہنگے تحفے کے باوجود گاڑی چلانے کے لیے ابھی انتظار کرنا ہوگا، کیونکہ بھارتی قوانین کے مطابق 15 سال کی عمر میں کار چلانے کا لائسنس نہیں مل سکتا۔ طلحہ کا کہنا ہے کہ فی الحال وہ اپنے والد کے ساتھ اس گاڑی میں سفر کرے گا۔
اس واقعے پر سوشل میڈیا صارفین بھی حیرت کا اظہار کر رہے ہیں، جہاں کم عمری میں اتنا قیمتی تحفہ ملنے پر مختلف تبصرے سامنے آ رہے ہیں۔