11 ماہ کے ایک بچے کو امریکی ریاست جنوبی کیرولائنا میں بچا لیا گیا، جہاں حکام کے مطابق اسے اس کے والد نے ایک صندوق میں زندہ دفن کر دیا تھا۔
حکام کا کہنا ہے کہ بچے کے والد نے اسے کتے کے پنجرے نما صندوق میں زندہ دفن کر دیا تھا 11 ماہ کے ایک بچے کو امریکی ریاست جنوبی کیرولائنا میں بچا لیا گیا، جہاں حکام کے مطابق اسے اس کے والد نے ایک صندوق میں زندہ دفن کر دیا تھا۔
کوآہ شارپ پیر کے روز سے لاپتہ تھا، جب اسے اس کے 25 سالہ والد مائیکل کومر اپنے ساتھ لے گئے تھے، جس کی اطلاع لیکسنگٹن کاؤنٹی شیرف کے دفتر نے دی۔
کومر کو پیر کی شام چوری کے ایک مقدمے میں گرفتار کر لیا گیا، تاہم اس وقت ان کا بیٹا ان کے ساتھ نہیں تھا۔
BBC World Service کی نئی ایپ ڈاؤن لوڈ کریں، 'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
لیکسنگٹن کاؤنٹی کے شیرف جے کون نے ایک پریس کانفرنس میں بتایا کہ بچہ منگل کے روز اپنے والد کے گھر کے قریب ہی ایک صندوق میں ’زندہ دفن‘ حالت میں ملا اور ’زندگی اور موت کی کشمکش میں تھا۔‘
حکام کا خیال ہے کہ وہ تقریباً 24 گھنٹے تک وہاں دفن رہا تھا۔
شیرف جے کون نے کہا کہ بچے کو اب ہسپتال میں طبی نگہداشت فراہم کی جا رہی ہے اور انھیں امید ہے کہ وہ مکمل صحت یاب ہو جائے گا۔
پولیس ابھی یہ فیصلہ کر رہی ہے کہ بچے کے والد کے خلاف مزید کون سے الزامات عائد کیے جائیں۔
11 ماہ کے کوآہ کی تلاش پیر کے روز اس وقت شروع ہوئی جب اس کے والد اسے اس کی والدہ کے گھر سے اپنے ساتھ لے گئے۔
شیرف جے کون کے مطابق، اس وقت بچے کی دیکھ بھال کومر کی والدہ کر رہی تھیں۔ انھوں نے کچھ دیر کے لیے اپنے بیٹے کو بچے کے ساتھ اکیلا چھوڑا، لیکن وہ اچانک کوآہ کو لے کر وہاں سے چلا گیا۔
کومر کو مختلف مقامات پر بچے کے بغیر جاتے ہوئے دیکھا گیا تھا، اور بعد میں انھیں لیکسنگٹن کاؤنٹی میں کوآہ کے بغیر گرفتار کر لیا گیا۔
اس کے بعد پولیس اور فائر ڈیپارٹمنٹ کے 100 اہلکاروں پر مشتمل ایک ٹیم بچے کی تلاش کے لیے روانہ کی گئی، شیرف نے بتایا۔
انھوں نے کہا کہ جب تفتیش کاروں نے کومر سے اس کے بیٹے کے بارے میں پوچھا تو اس نے اس کے ٹھکانے کے بارے میں زیادہ کچھ نہیں بتایا۔
شیرف جے کون نے بتایا کہ امدادی اہلکاروں نے کومر کے گھر کے قریب جنگل میں تلاش کے دوران زمین کا ایک حصہ دیکھا جہاں حال ہی میں کھدائی کی گئی تھی۔
جب انھوں نے کھدائی شروع کی تو انھیں ایک بچے کے رونے کی آواز سنائی دی، جسے شیرف نے ’زندگی کی سب سے خوشی دینے والی آواز‘ قرار دیا۔
انھوں نے کہا، ’پھر سب کی دوڑ لگ گئی۔ ہر کوئی وہاں پہنچ کر بچے کو باہر نکالنے کی کوشش کر رہا تھا۔‘
ان کے مطابق، صندوق ایک تولیے میں لپٹا ہوا تھا، جس سے غالباً کوآہ کو زندہ رہنے کے لیے کافی ہوا ملتی رہی، جبکہ سرد موسم نے اسے کم ہوا میں زیادہ گرم ہونے سے بھی بچائے رکھا۔
جے کون نے وضاحت کی: ’میرا اندازہ ہے کہ وہ تقریباً دو فٹ بائی دو فٹ (61 سینٹی میٹر بائی 61 سینٹی میٹر) کا کتے کا پنجرہ نما صندوق تھا۔ میرا خیال ہے کہ جب وہ زمین میں رکھا گیا تو صندوق کے اوپر اور زمین کی سطح کے درمیان تقریباً ایک فٹ کا فاصلہ تھا۔‘
بچے کے والدین کے تعلقات کے بارے میں شیرف نے کہا کہ ان کے درمیان ’واضح طور پر کچھ مسائل‘ موجود تھے۔
عدالتی ریکارڈ کے مطابق، کومر اس سے پہلے گھریلو تشدد کے الزامات میں جرم قبول کر چکا تھا۔
کومر کی والدہ پیٹریشیا کومر نے این بی سی نیوز کو بتایا کہ کوآہ کی والدہ کو اس کی مکمل تحویل حاصل تھی، تاہم وہ کبھی کبھار ان کی نگرانی میں بچے کو اپنے والد سے ملنے دیتی تھیں۔
ان کے مطابق، ان کا بیٹا اس سے پہلے بھی بچے کی اکیلے دیکھ بھال کر چکا تھا اور کبھی کوئی مسئلہ پیش نہیں آیا تھا۔
پیٹریشیا کومر نے کہا: ’سچ کہوں تو میں اس کی ماں ہوں، اور میں نے کبھی نہیں سوچا تھا کہ وہ ایسا کچھ کر سکتا ہے۔‘
BBC World Service کی نئی ایپ ڈاؤن لوڈ کریں۔
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔
