ایوان صدر میں اہم بیٹھک: وزیراعظم اور صدر مملکت کا سیاسی معاملات بات چیت سے حل کرنے کا فیصلہ

image

ایوان صدر اسلام آباد میں صدر مملکت آصف علی زرداری اور وزیراعظم شہباز شریف کے درمیان ایک اہم ملاقات ہوئی ہے، جس میں دونوں رہنماؤں نے ملک کے تمام سیاسی و انتظامی معاملات کو باہمی بات چیت اور مشاورت سے حل کرنے پر اتفاق کیا ہے۔

ایوان صدر سے جاری کردہ سرکاری اعلامیے کے مطابق اس ملاقات میں وفاقی وزیر داخلہ محسن نقوی بھی شریک تھے۔ اعلامیے میں بتایا گیا ہے کہ ملاقات کے دوران ملک کی مجموعی سیاسی صورتحال اور مشرق وسطیٰ کے حالات پر تبادلہ خیال کیا گیا۔ دونوں رہنماؤں نے اس بات پر زور دیا کہ ماضی کی آئینی ترامیم بھی تمام اتحادی جماعتوں کی باہمی رضامندی سے منظور کی گئی تھیں اور آئندہ بھی تمام مسائل کا حل مل بیٹھ کر نکالا جائے گا۔

دوسری جانب نجی ٹی وی کے پروگرام میں گفتگو کرتے ہوئے سینئر صحافی حامد میر نے بتایا کہ اس ملاقات کا ایک اہم مقصد وفاقی وزرا اور چیئرمین پیپلز پارٹی بلاول بھٹو زرداری کے درمیان جاری بیان بازی کو روکنا تھا۔ حامد میر کے مطابق بلاول بھٹو زرداری نے صدر زرداری کو آگاہ کیا کہ چونکہ بعض وفاقی وزرا کھلے عام نئے صوبوں کے قیام کے لیے ریفرنڈم کے حق میں بیانات دے رہے ہیں، اس لیے انہوں نے بھی جوابی طور پر اپنی جماعت کا مؤقف واضح کیا ہے۔

وزیراعظم سے ملاقات کے بعد ایوان صدر میں پاکستان پیپلز پارٹی کی اعلیٰ قیادت کا ایک مشاورتی اجلاس بھی منعقد ہوا۔ ذرائع کے مطابق اس اجلاس میں صدر آصف علی زرداری، بلاول بھٹو زرداری، فریال تالپور، وزیراعلیٰ سندھ مراد علی شاہ، سہیل انور سیال اور وفاقی وزیر داخلہ محسن نقوی نے شرکت کی۔ اجلاس میں وفاقی حکومت کے ساتھ قانون سازی کے معاملات، متنازع امور اور نئے صوبوں کی تشکیل سے متعلق جاری بحث پر تفصیلی غور کیا گیا۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US