عوامی راج پارٹی کے سربراہ اقرار الحسن کے خلاف ریاست مخالف مواد کی تشہیر سے متعلق مقدمہ اہم مرحلے میں داخل ہوگیا۔ کراچی کی جوڈیشل مجسٹریٹ شرقی کی عدالت نے ان پر فردِ جرم عائد کردی، تاہم اقرار الحسن نے اپنے خلاف لگائے گئے تمام الزامات کو مسترد کرتے ہوئے صحتِ جرم سے انکار کردیا۔
اقرار الحسن اپنے وکلا کے ہمراہ عدالت میں پیش ہوئے، جہاں کارروائی کے بعد استغاثہ کو آئندہ سماعت پر گواہوں اور شواہد کے ساتھ حاضر ہونے کی ہدایت کی گئی۔ عدالت نے کیس کی مزید سماعت 9 دسمبر تک ملتوی کرتے ہوئے اقرار الحسن کو بھی اپنی حاضری یقینی بنانے کا حکم دیا۔ وہ اس مقدمے میں پہلے ہی ضمانت پر ہیں۔
دوسری جانب سماعت کے دوران ضبط شدہ موبائل فونز اور آئی پیڈ کی واپسی کا معاملہ بھی سامنے آیا۔ اقرار الحسن کے وکلا نے عدالت کو بتایا کہ گرفتاری کے وقت ان کے علاوہ ان کی اہلیہ کا موبائل فون بھی تحویل میں لیا گیا تھا۔ متعلقہ حکام نے فارنزک جانچ مکمل ہونے کے بعد تمام آلات واپس کرنے کی یقین دہانی کرائی تھی، لیکن اب تک ایسا نہیں ہوا۔
عدالت نے الیکٹرانک آلات کی واپسی سے متعلق درخواست پر فیصلہ محفوظ کرلیا، جو پیر کو سنایا جائے گا۔ عدالت کے مطابق اس دوران فارنزک رپورٹ بھی موصول ہونے کی توقع ہے۔ اب مقدمے کی اگلی کارروائی میں استغاثہ کے گواہوں اور پیش کیے جانے والے ثبوتوں کو اہمیت حاصل ہوگی۔