غیرملکی نیوز ایجنسی کے مطابق بھارتی ریاست کریلا کے علاقے کننر سے تعلق رکھنے والا مزدور کروڑوں روپے کا مالک بن گیا، زبردست بمپر لاٹری نے معمول کی بنیاد پر چند روپے کی دہاڑی کمانے والے شخص کی قسمت ہی چمکا دی۔
رپورٹ کے مطابق راجن پیرونن نامی مزدور کی 12 کروڑ کی لاٹری نکلی، مذکورہ شخص نے اپنے مکان کی تعمیر کے لیے مقامی بینک سے قرض لیا تھا جبکہ رقم واپس نہ کرنے کی صورت میں بینک مالکان نے گھر بھی ضبط کرلیا تھا۔ راجن نے عزم ظاہر کیا ہے کہ وہ جیتی ہوئی رقم سے قرض ادا کرتے ہوئے گھر کو دوبارہ
نئے سرے سے تعمیر کروائے گا۔
تفصیلات کے مطابق مزدور کا ایک بیٹا اور دو بیٹیاں ہیں۔ مقامی میڈیا ذرائع سے بات چیت کے دوران مزدور نے اپنی خوشی ظاہر کرتے ہوئے کہا کہ وہ ان پیسوں سے اپنی چھوٹی بیٹی کی شادی بھی کرے گا، اور ہمیشہ اسی آس میں رہتا تھا کہ کاش جلد میری لاٹری نکلے اور آخر کار وہ دن آہی گیا، اور آج کہہ سکتا ہوں کہ میرے پاس سب کچھ ہے۔
رپورٹ میں بتایا گیا کہ 12 کروڑ میں سے ٹیکس کی کٹوتی کے بعد مزدور کو 7.2 کروڑ ملیں گے۔