بھارتی شہر بنگلور میں شہریت کے متنازع قانون کے خلاف احتجاج کے دوران ایک لڑکی نے پاکستان زندہ باد کا نعرہ بلند کر دیا۔
ذرائع کے مطابق بھارت میں مسلمانوں کے خلاف شہریت کے متنازع قانون کے خلاف احتجاج جاری ہے، بھارتی میڈیا کا کہنا ہے کہ بنگلور میں احتجاجی جلسے کے دوران ایک امولیا لیونا نامی لڑکی نے پاکستان زندہ باد کا نعرہ لگا دیا۔
پولیس نے لڑکی کو فوری طور پر گرفتار کر کے اس کے خلاف بغاوت کا مقدمہ درج کر دیا، بھارتی میڈیا کے مطابق نعرہ لگانے والی لڑکی کو جوڈیشل کسٹڈی پر 23 فروری تک جیل بھیج دیا گیا ہے۔
بنگلور میں جاری احتجاج میں آل انڈیا مجلس اتحاد المسلمین کے رہنما اسدالدین اویسی بھی موجود تھے، لڑکی کو اسٹیج پر بلایا گیا تو اس نے شرکا سے کہا کہ میرے ساتھ نعرہ لگائیں پاکستان زندہ باد۔ یہ سنتے ہی مسلم رہنما اویسی نے لپک کر لڑکی سے مائیک چھین لیا مگر لڑکی نے کسی صورت مائیک نہ دیا اور نعرے لگاتی رہی۔
نعرے لگانے والا یہ واقعہ انٹرنیٹ پر نہایت تیزی سے وائرل ہوا جس کے بعد امولیا لیونا اور اس کے اہلخانہ کے خلاف شدید غم و غصے کا اظہار کیا گیا۔ لڑکی کے والد نے بتایا کہ شدت پسند ہندوؤں کا ایک گروپ ان کے گھر پر آیا اور ان سے بھارت کے حق میں نعرہ لگانے کا مطالبہ کیا۔