میکسیکو اور مغربی امریکا کے صحراؤں میں پائے جانے والی ایک چھوٹی سی چھپکلی جس کے سر پر سینگوں جیسے ابھار موجود ہوتے ہیں جن کی وجہ سے یہ ’’ریگل ہارنڈ لیزارڈ‘‘ (شاندار سینگوں والی چھپکلی) بھی کہلاتی ہے۔ اس چھپکلی کی خاصیت یہ ہے کہ یہ اپنے دشمن پر حملہ کرنے کے لئے اپنی آنکھوں سے خون کی تیز پچکاری مارتی ہے۔
ہارنڈ لیزارڈ کا خون ویسے تو زہریلا نہیں ہوتا لیکن شکاری کو کچھ وقت کے لئے چونکنے پر مجبور کر دیتا ہے۔ اور اس کا فائدہ اٹھاتے ہوئے چھپکلی موقع سے فرار ہو جاتی ہے۔ اس سینگوں والی چھپکلی کی لمبائی صرف 3 سے 4 انچ ہوتی ہے جبکہ یہ چھوٹی صحرائی چیونٹیوں اور مختلف کیڑے مکوڑوں کو اپنی غذا بناتی ہے۔
ماہرین کے مطابق یہ چھپکلی بیک وقت 2500 تک چیونٹیاں ہڑپ کر جاتی ہے لیکن اپنے شکار کو خون کی پچکاری سے نشانہ نہیں بناتی۔
اس کے علاوہ یہ اپنے حملہ آور پر خون کی پچکاری پھینکنے کا وار اس وقت کرتی ہے جب اسے یقین ہو جاتا ہے کہ اس کی جانب آنے والا جانور واقعی حملہ کرنے کے لیے تیار ہے۔ زیادہ تر سانپ، صحرائی بھیڑیے اور چوہوں سے اس چھپکلی کو خطرہ لاحق ہوتا ہے۔