کورونا وائرس کے باعث ملک بھر میں لاک ڈاؤن کی صورتحال برقرار ہے جبکہ متعدد افراد گھروں میں محصور ہو کر رہ گئے ہیں، یہی وجہ ہے کہ لوگ اپنے گھروں میں رہتے ہوئے آفس کا کام کررہے ہیں۔
آفس کا کام گھر سے کرنے میں خاصی پریشانیوں کا سامنا کرنا پڑتا ہے، آفس میں آپ یکسوئی سے کام کرسکتے ہیں لیکن گھر میں آپ کی توجہ بنٹی رہتی ہے۔ سب سے بڑی دشواری کا سامنا تو ایک ہی جگہ بیٹھ کر کام کرنا ہے، اور اگر وہ جگہ آرام دہ نہیں ہوئی تو الگ مسئلہ۔
پھر کچھ لوگوں کو انٹرنیٹ کے مسائل کا بھی سامنا کرنا پڑتا ہے، ان تمام تر مسائل سے بچاؤ اور انہیں کم کرنے کے لیے آج ہم آپ کو گھر میں کام کرنے کے حوالے سے چند ہدایات دیں گے۔
کام کرنے کے دوران ضروری ہے کہ آپ کا لیپ ٹاپ یا کمپیوٹر آپ کی آنکھوں کی سیدھ میں رکھا ہو، زیادہ اوپر یا زیادہ نیچے لیپ ٹاپ رکھ کر کام کرنے سے آپ کی آنکھوں اور سر میں درد ہوسکتا ہے جس سے آپ کو پریشانی ہو سکتی ہے۔
کام کرتے دوران ضروری ہے کہ آپ اپنے بیٹھنے کی پوزیشن کو نہ خراب کریں اور جھک کر یا ٹیڑھے ہو کر نہ بیٹھیں، ایسا کرنا گردن میں تکلیف کا باعث بن سکتا ہے۔
7 یا 8 گھنٹے بنا رکاوٹ کے بیٹھ کر کام کرنے والے لوگوں کو چاہیے کہ وہ کام کے دوران ہر آدھے گھنٹے بعد تھوڑی دیر کے لیے کھڑے ہوں یا ہلکی پھلکی چہل قدمی کرلیں، اس سے وہ بہتر محسوس کریں گے-
کام کے دوران اپنی کمر کے پیچھے کوئی کشن یا تکیہ رکھ لیں اس طرح کرنے سے بھی آپ کو کام کرتے دوران آرام ملے گا اور آپ کا کام اچھی طرح سے ہو سکے گا۔
کرسی پر بیٹھے بیٹھے گردن اور ہاتھوں کی چند ورزش کرنے سے بھی آپ کی کمر اور گردن میں تکلیف نہیں ہوگی۔