ہم نے ایسی کئی انوکھی شادیوں سے متعلق سنا ہے کہ ایک شخص نے دو دولہنوں سے ایک ہی دن شادی رچا لی یا زیادہ سے زیادہ ایک آدمی پانچ سے چھ شادیاں کرنے کے بعد ساتویں شادی کرنے کا سوچ رہا ہو۔
لیکن اب ایک ایسا شخص سامنے آیا ہے جس نے ہمت اور بہادری کے ساتھ اپنی 28 بیگمات کی موجودگی میں 37 ویں شادی کر لی۔ یقیناً یہ ایک بڑی خبر ہے۔
سماجی رابطے کی ویب سائٹ ٹوئٹر پر ایک صارف کی جانب سے مذکورہ شخص کی 37 ویں شادی کرتے ہوئے ویڈیو شئیر کی گئی جو دیکھتے ہی دیکھتے سوشل میڈیا پر مقبول ہوگئی۔
ویڈیو میں دیکھا جا سکتا ہے کہ ایک بوڑھا عربی شخص اپنی جوان دلہن کے ساتھ بیٹھا ہے اور آس پاس اس کی دیگر بیگمات بچوں سمیت موجود ہیں۔
ویڈیو سے متعلق دعویٰ سامنے آیا ہے کہ شادی کرنے والے شخص کی یہ 37 ویں شادی ہے جو اس کی 28 بیویوں، 135 بچوں اور 126 پوتے پوتیوں کی موجودگی میں ہوئی ہے۔
اس سے پہلے زمبابوے سے تعلق رکھنے والے 66 سالہ شخص کی خبر وائرل ہوئی تھی جس حوالے سے ایک رپورٹ میں دعویٰ کیا گیا تھا کہ وہ 151 بچوں اور 16 بیویوں کا شوہر ہے۔