پیپلز پارٹی نے کراچی میں میئر کے انتخاب کا عمل آگے بڑھانے کیلیےالیکشن کمیشن کو خط لکھ دیا۔
پاکستان پیپلز پارٹی کے مرکزی الیکشن سیل کے انچارج سینیٹر تاج حیدر نے چیف الیکشن کمشنر کو خط لکھ دیا۔ خط میں پاکستان پیپلزپارٹی نے کراچی میں میئر کے انتخابات میں تاخیر پر تشویش کا اظہار کیا ہے۔
سینیٹر تاج حیدر نے چیف الیکشن کمشنر کو خط میں لکھا کہ محض 11 نشستوں پر انتخاب کی وجہ سے 250 اراکین کو میئر کے انتخاب سے روکنا انصاف نہیں ہے۔
خط میں کہا گیا ہے کہ میئر کے انتخاب میں تاخیر کا کوئی عذر ہم درست نہیں سمجھتے۔ پاکستان پیپلز پارٹی نے چیف الیکشن کمشنر سے مطالبہ کیا ہے کہ الیکشن کمیشن بلاتاخیر کراچی کے میئر کے لئے انتخاب کرائے۔