راولپنڈی: جنوبی وزیرستان میں دہشتگردی کے خلاف آپریشن کو لیڈ کرتے ہوئے بریگیڈیئر مصطفیٰ کمال برکی شہید ہو گئے ہیں جب کہ سات سیکیورٹی اہلکار زخمی ہیں جن میں سے دو شدید زخمی ہیں۔
پاک فوج کے شعبہ تعلقات عامہ (آئی ایس پی آر) کے مطابق دہشت گردوں کے ساتھ فائرنگ کا تبادلہ جنوبی وزیر ستان کے علاقے انگور اڈا میں ہوا۔ بریگیڈیئر مصطفیٰ کمال برکی کا تعلق انٹرسروسز انٹیلی جنس (آئی ایس آئی) سے تھا۔
بریگیڈیئر مصطفیٰ کمال برکی جنوبی وزیرستان میں آپریشن کو لیڈ کرتے ہوئے شہید ہوئے ہیں، ان کا تعلق انٹر سروسز انٹیلی جنس سے تھا۔ انہوں نے اے پی ایس حملے میں ملوث دہشت گردوں کے خاتمے میں کردار ادا کیا تھا۔
شہید بریگیڈیئر مصطفیٰ کمال برکی نے 12 اکتوبر 1995 کو فرنٹیئر فورس رجمنٹ میں کمیشن حاصل کیا۔ سوگواران میں، اہلیہ، ایک بیٹا اور ایک بیٹی شامل ہیں۔
آئی ایس پی آر کے مطابق مسلح افواج نے ملک کے ہر انچ سے دہشت گردی کی لعنت ختم کرنے کےعزم کا اعادہ کیا ہے۔ وطن کی مٹی اور پوری قوم اپنے اس جری بیٹے کو سلامِ عقیدت پیش کرتی ہے۔