ڈی جی آئی ایس پی آر لیفٹیننٹ جنرل احمد شریف کا کہنا ہے کہ جہاد کا اعلان صرف ریاست کا اختیار ہے۔ جہاد کا اعلان کسی فرد یا گروہ کا نہیں بلکہ ریاست کا اختیار ہے۔ڈی جی آئی ایس پی آر لیفٹیننٹ جنرل احمد شریف نے کراچی میں مختلف مذاہب اور سماجی طبقات کے نمائندوں سے ملاقات کی۔ شرکاء نے ان کا والہانہ استقبال کیا اور قومی یکجہتی کے فروغ پر پاک فوج کے کردار کو سراہا۔
کراچی میں مختلف مذاہب اور سماجی حلقوں سے ملاقات کے دوران ڈی جی آئی ایس پی آر لیفٹیننٹ جنرل احمد شریف نے کہا کہ پاکستان میں تمام مذاہب کے ماننے والے برابر کے شہری ہیں۔ آئین تمام مذاہب کو مکمل حقوق فراہم کرتا ہے اور قومی اتحاد صرف برابری اور ہم آہنگی سے ہی ممکن ہے۔
انہوں نے واضح کیا کہ بھارت پاکستان میں دہشتگردی کی پشت پناہی کر رہا ہے جس کا پاک فوج جدید جنگی حکمت عملی کے ساتھ بھرپور جواب دے رہی ہے۔ لیفٹیننٹ جنرل احمد شریف کا کہنا تھا کہ نسلی یا لسانی نفرت جہالت ہے اور تمام پاکستانی برابر ہیں۔ اگر متحد رہیں تو کوئی طاقت ہمیں شکست نہیں دے سکتی۔
انہوں نے یہ بھی واضح کیا کہ جہاد کا اعلان صرف ریاست کا اختیار ہے کسی فرد یا گروہ کو یہ حق حاصل نہیں۔ مختلف مذاہب اور سماجی حلقوں کے نمائندوں نے اس ملاقات کو خوش آئند قرار دیتے ہوئے کہا کہ اس طرح کی نشستیں قومی ہم آہنگی میں اضافہ کرتی ہیں اور ان کا تسلسل وقت کی ضرورت ہے۔