ڈسٹرکٹ اینڈ سیشن کورٹ اسلام آباد میں خاتون جج کو دھمکی دینے کے کیس میں عمران خان کے ناقابل ضمانت وارنٹ گرفتاری معطل کرنے کی درخواست پر محفوظ فیصلہ سنا دیا۔
عدالت نے ناقابل ضمانت وارنٹ گرفتاری کو قابل ضمانت وارنٹ گرفتاری میں تبدیل کر دیا ہے۔ عدالت نے عمران خان کی وارنٹ منسوخی کی درخواست ہدایت کے ساتھ نمٹا دی، 29مارچ تک عمران خان کے ناقابلِ ضمانت وارنٹ گرفتاری جاری ہوئے تھے۔
عدالت میں عمران خان کے وکیل گوہرعلی اور پراسیکیوٹر رضوان عباسی پیش ہوئے، وکیل کا کہنا تھا کہ عمران خان توشہ خانہ کیس میں 30مارچ کو کچہری آرہے ہیں، انہوں نے موقف ظاہر کرتے ہوئے کہا کہ آپ وارنٹ معطلی جاری رکھیں۔
وکیل گوہر علی کا کہنا تھا کہ توشہ خانہ کیس والے وارنٹ 30مارچ تک معطل ہیں، سول کورٹ میں وارنٹ گرفتاری کی تاریخ 29 سے 30مارچ کی درخواست کرتاہوں۔
جج نے اس موقع پر استفسار کرتے ہوئے کہا کہ آپ عجیب بات کررہے، 30مارچ کی استدعا کررہے ہیں وارنٹ گرفتاری کا حکم 29 کاہے،29مارچ کو عدالت کوئی بھی فیصلہ جاری کرسکتی ہے۔
اس موقع پر جج نے استفسار کیا کہ عمران خان خاتون جج کیس میں کبھی پیش ہوئے؟ جس پر پراسیکیوٹر کا کہنا تھا کہ عمران خان کیس میں کبھی پیش نہیں ہوئے، مقدمے کے نقول بھی دینی ہیں۔