آج کل اس ملک میں جسے دیکھو اپنی من مانی کر رہا ہے چاہے پھر وہ کسی چھوٹے پیمانے پر کرے یا پھر بڑے، ہر کوئی اپنا مطلب پورا کرنے کے لیئے عوام کا خون پی رہا ہے۔ کبھی پیٹرول کی قیمت میں راتوں رات اضافہ ہوجاتا ہے تو کبھی کھانے پینے اور پہنے اوڑھنے کی چیزوں میں، ایسے میں عوام کرے تو کیا کرے۔
جیسا کہ کراچی میں دودھ فروش مافیا دوبارہ سے بے لگام ہوگئی، اور ایک بار پھر دودھ کی قیمت میں من مانا اضافہ کردیا۔
تفصیلات کے مطابق، کراچی میں دودھ مزید 10 روپے فی لیٹر مہنگا ہوگیا، اور انتظامیہ اس بار بھی آنکھیں بند کر کے بیٹھی ہے۔
کراچی میں دودھ فروشوں کی من مانیاں جاری ہیں جبکہ دوسری جانب کوئی بھی اس ناجائز قیمتوں پر ایکشن لینے والا نہیں ہے، ایسا لگتا ہے جیسے عوام کو بھوکے شیروں کے سامنے کھلا چھوڑ دیا گیا ہو۔
پیٹرول اور ڈیزل کی قیمتوں میں خاطر خواہ کمی کے باوجود دودھ فروشوں نے قیمتوں میں من مانا اضافہ کرتے ہوئے فی لیٹر پیسے بڑھا دیئے ہیں۔
اس سے قبل فروری میں بھی دودھ کی قیمت 20 روپے فی لیٹر بڑھائی گئی تھی۔