پاکستان کرکٹ ٹیم کے سابق کپتان انضمام الحق نے پی سی بی سی چیف سلیکٹر بننے کیلئے صدر پاکستان سے بھی زیادہ تنخواہ کا مطالبہ کردیا ہے۔
پی سی بی اور چیف سلیکٹر انضمام الحق کے درمیان تنخواہ کے معاملات ابھی تک طے نہیں ہوسکے ہیں تاہم پی سی بی ترجمان کا کہنا ہے کہ کرکٹ بورڈ اور انضمام کے معاملات طے پاگئے ہیں۔
ترجمان پی سی بی کا کہناانضمام الحق ملتان جارہے ہیں جہاں وہ کپتان بابر اعظم، ڈائریکٹر کرکٹ مکی آرتھر اور ہیڈ کوچ گرانٹ بریڈ برن سے مل کرورلڈ کپ کے لیے قومی ٹیم کو حتمی شکل دیں گے۔
دوسری جانب میڈیا رپورٹ میں دعویٰ کیا گیا ہے کہ انضمام الحق نے چیئرمین سلیکشن کمیٹی بننے کے لیے پی سی بی سے چار سال کا معاہدہ اور 25لاکھ روپے تنخواہ دینے کا مطالبہ کیا ہے۔
کرکٹ بورڈ نےانضمام الحق کو 15لاکھ روپے دینے کی پیشکش کی تھی۔ انضمام الحق نے کہا ہے کہ 18لاکھ روپےتنخواہ دی جاتی ہے تو پشاور زلمی اور ٹیلی ویژن پر کام کرنے کی اجازت دی جائے۔
یاد رہے کہ پاکستان ٹیم کے سابق کپتان اپنے طویل کیریئر میں کروڑوں روپے کماچکے ہیں کیونکہ پاکستان میں صدر مملکت اور چیف جسٹس یا وزیراعظم کو بھی اتنی تنخواہ نہیں ملتی جنتی کرکٹرز کو ملتی ہے۔