پاکستان کرکٹ ٹیم کے سابق کپتان معین خان کا کہنا ہے کہ بھارت کیخلاف پاکستان کو پہلے بیٹنگ کرنی چاہیے تھی، بابراعظم نے ٹاس جیتنے کے باوجود پہلے بولنگ کرکے غلطی کی۔
معین خان کا کہنا ہے کہ سپر فور مرحلے میں قومی ٹیم کی بھارت کے ہاتھوں بدترین شکست کے بعد پاکستان کو سری لنکا کو لازمی طور پر اچھے مارجن سے میچ ہرانا ہوگا ورنہ پاکستان ایونٹ سے باہر ہوجائے گا۔
انڈیا نے پاکستان کو بیٹنگ، بولنگ اور فیلڈنگ، ہر شعبے میں آؤٹ کلاس کردیا، انڈیا کی فاسٹ اور اسپن بولنگ ہماری بولنگ سے بہت زیادہ بہترتھی، ایسا لگتا ہے پاکستان کے نئے فاسٹ بولرز اپنی کارکردگی پر زیادہ پراعتماد ہوگئے تھے۔
سابق کپتان نے کہا کہ بابراعظم نے ٹاس جیتنے کے باوجود پہلے بولنگ کرکے غلطی کی، موسم اور پچ کے حساب سے پہلے بیٹنگ زیادہ سود مند تھی، جس سے بھارت نے فائدہ اٹھایا، پاکستان کرکٹ ٹیم کو اپنی خامیوں کا جائزہ لینا ہوگا۔
معین خان نے قومی ٹیم کی حکمت عملی پر تنقید کرتے ہوئے کہا کہ پاکستان ٹیم لگتا ہے یہ سوچ کر میدان میں اتری تھی کہ بارش ہوجائے گی اور دونوں ٹیموں کو ایک ایک پوائنٹ مل جائے گا۔
پاکستان ٹیم کے بلے بازوں کی بزدلی اور دفاعی انداز کی وجہ سے بھارت کے آرڈنری بولرز بھی پاکستان کیلئے خطرناک ہوگئے تھے۔اب پاکستان کو سری لنکا کو بڑی مارجن سے ہرانا ہوگا ورنہ جیت کی صورت میں بھی پاکستان کو کوئی فائدہ نہیں ہوگا۔