بیجنگ۔6جنوری (اے پی پی):چین کے نائب وزیر خارجہ سون وے ڈونگ نے میانمار کے دورہ کے دوران میانمار کے رہنماؤں سے ملاقاتوں میں چین میانمار تعلقات اور شمالی میانمار کی صورتحال پر تفصیلی تبادلہ خیال کیا ہے۔ چینی میڈیا کے مطابق فریقین نے دونوں ممالک کے رہنماؤں کے درمیان طے پانے والے اتفاق رائے پر مکمل عمل درآمد، اعلیٰ معیار کے بیلٹ اینڈ رو ڈ کی مشترکہ تعمیر ، چین میانمار اقتصادی راہداری کی تعمیر جاری رکھنے اور چین میانمار ہم نصیب معاشرے کی تعمیر میں تیزی لانے پر اتفاق کیا۔
فریقین نے اتفاق کیا کہ چین میانمار سرحد پر امن و استحکام برقرار رکھنے، ٹیلی کام فراڈ جیسی سرحد پار مجرمانہ سرگرمیوں کا مقابلہ کرنے میں تعاون اور علاقائی امن، سکون، ترقی اور خوشحالی کو فروغ دینے کے لئے مل کر کام کریں گے۔ چین نے اس موقف کا بھی اعادہ کیا کہ وہ شمالی میانمار میں قیام امن کے عمل کی حمایت میں تعمیری کردار ادا کرتا رہے گا۔