ر یاض ۔29جنوری (اے پی پی):سعودی عرب کی قطیف کمشنری میں مقامی شہری ماہر الغانم نے اپنے دوست کے ساتھ مل کر انتہائی نادر و نایاب اشیا جمع کر کے میوزیم قائم کرلیا ہے۔
سعودی ٹی وی الاخباریہ سے گفتگو کرتے ہوئے ماہر الغانم نے بتایا کہ انہیں قدیم اشیا جمع کرنے کا شوق تھا اور اس نے اپنے دوست حسن العوامی سے مل کرپرانی و نادر اشیا جمع میوزیم قائم کرلیا جس میں سات برس کا عرصہ لگا۔ انہوں نے کہا کہ میوزیم میں انتہائی نادراشیا موجود ہیں جن میں سے بعض ہزاروں برس پرانی ہیں۔انہوں نے کہا کہ میوزیم میں 50 کی دہائی میں مملکت میں آنے والا پہلا ٹی وی سیٹ،جنگ خلیج اور پہلی و دوسری عالمی جنگ کی اشیا رکھی گئی ہیں جن میں فوجیوں کی خوراک کے ڈبے ، سرپر پہننے والےحفاظتی ٹوپ، بندوق کی گولیاں اور جنگی لباس وغیرہ شامل ہیں۔میوزیم میں ہزاروں برس قدیم زیر استعمال کئے جانے والے مٹی سے بنے برتن اور صراحیوں کے علاوہ بعض انتہائی نادر و قیمتی پتھر بھی رکھے گئے ہیں۔