لاہور۔18مئی (اے پی پی):پاکستان مسلم لیگ( ن) کے مرکزی رہنما خواجہ سعد رفیق نے کہا ہے کہ وزیرِ اعلی کے پی کو وفاقی حکومت سے متعلق لفظی گولہ باری زیب نہیں دیتی، پی ٹی آ ئی نے ہمیشہ انتشار کی سیاست کی ہے ۔
ہفتہ کے روز یہاں ماڈل ٹائون میں پارٹی اجلاس میں شرکت کے بعد میڈیا سے گفتگو کرتے ہوئے ایک سوال کے جواب میں خواجہ سعد رفیق نے کہاکہ مولانا فضل الرحمن میرے بڑے بھائی ہیں، ان سے پیار و محبت کا فطری رشتہ ہے، ان کے ساتھ فطری ناراضی ہو سکتی ہے۔ایک اور سوال کے جواب میں انہوں نے کہا کہ وزیرِ اعلی کے پی کو وفاقی حکومت سے متعلق لفظی گولہ باری زیب نہیں دیتی، لگتاہے ان سے کام نہیں چلنا، اسی لیئے وہ چاہتے ہیں کہ ایسی صورتحال پیدا کریں۔ انہوں نے کہا کہ تحریک انصاف کی تاریخ ہے کہ وہ ہمیشہ انتشار پیدا کرتے ہیں اور جب بھی ملک چلنے لگتا ہے وہ چلنے نہیں دیتے۔