گزشتہ شب شاہ فیصل کالونی نمبر تین میں رہائشی عمارت کے نیچے قائم پیٹرول پمپ میں ہولناک آگ لگنے کا واقعہ پیش آیا۔ جس کے نتیجے میں ایک شخص جان کی بازی ہار گیا، جبکہ 10 سے زائد موٹر سائیکلیں جل کر راکھ ہو گئیں۔
اطلاع ملنے پر فائربریگیڈ کی تین گاڑیاں موقع پر پہنچیں، لیکن آگ بے قابو ہو کر عمارت اور نیچے بنی دکانوں تک پھیل گئی، جس کے بعد مزید دو فائر ٹینڈرز کو طلب کیا گیا۔
عمارت فوری طور پر خالی کرالی گئی، لیکن ایک بدقسمت شہری آگ کی لپیٹ میں آ کر جاں بحق ہوگیا، جس کی شناخت تاحال نہیں ہو سکی۔
بعد ازاں ایس ایس پی کورنگی توحید رحمان میمن نے میڈیا سے گفتگو کرتے ہوئے بتایا کہ عمارت میں قائم پیٹرول پمپ کے مالک کے پاس عدالت کے احکامات موجود ہیں، جس کے باعث پولیس کوئی کارروائی نہیں کر سکتی۔
جبکہ ابتدائی تحقیقات میں معلوم ہوا کہ آگ جلتی ہوئی سگریٹ پھینکے جانے سے لگی، جسے ایک لڑکے نے پیٹرول پمپ کے قریب پھینکا تھا۔
علاقہ مکینوں کا احتجاج: رہائشی علاقوں میں پیٹرول پمپ خطرہ ہیں
علاقہ مکینوں نے واقعے کے بعد شدید احتجاج کرتے ہوئے کہا کہ رہائشی علاقوں میں پیٹرول پمپ حادثات کا سبب بنتے ہیں، انہیں فوری طور پر ختم کیا جائے۔
کئی گھنٹوں کی جدوجہد کے بعد فائربریگیڈ نے آگ پر قابو پالیا، جس کے بعد عمارت میں سرچ آپریشن بھی کیا گیا۔
گورنر سندھ اور وزیراعلیٰ کا نوٹس
گورنر سندھ کامران ٹیسوری نے جائے وقوعہ کا دورہ کیا، جبکہ وزیراعلیٰ سندھ مراد علی شاہ نے آگ لگنے کا سختی سے نوٹس لیا۔
ترجمان وزیراعلیٰ کے مطابق، مراد علی شاہ نے کمشنر کراچی اور ڈپٹی کمشنر ملیر کو فوری طور پر موقع پر پہنچنے اور واقعے کی تفصیلی رپورٹ پیش کرنے کی ہدایت جاری کی ہے۔