پاکستانی فاسٹ بولر شاہین آفریدی جو اس وقت انگلینڈ کے خلاف ٹیسٹ سیریز سے باہر ہوچکے۔ البتہ آجکل وہ اپنی نئی زندگی کا ایک خوبصورت مرحلہ انجوائے کر رہے ہیں۔ جمعرات کو انہوں نے اپنے نومولود بیٹے آلیار کے ساتھ ایک دلکش لمحہ شیئر کیا، جو سوشل میڈیا پر دیکھتے ہی دیکھتے وائرل ہوگیا۔
انسٹاگرام پر پوسٹ کی جانے والی اس تصویر میں شاہین کو اپنے معصوم بیٹے کو سینے سے لگائے دیکھا جاسکتا ہے، جس کے چہرے کی مکمل جھلک سامنے نہیں آئی۔ کرکٹر نے اس تصویر کے ساتھ ایک مختصر مگر معنی خیز کیپشن لکھا: "میں سکون میں ہوں"، جس نے ان کے مداحوں کے دل جیت لیے۔
شاہین آفریدی کی یہ پوسٹ مداحوں کے درمیان تیزی سے مقبول ہو رہی ہے، جہاں ان کے فالوورز اور فینز کی جانب سے دلکش تبصرے کیے جارہے ہیں اور شاہین، انشا، اور ان کے ننھے بیٹے آلیار کے لیے نیک خواہشات کا اظہار کیا جا رہا ہے۔
یاد رہے کہ شاہین آفریدی اور انشا شاہد کے گھر اگست میں ننھے آلیار کی آمد نے ان کی زندگی میں خوشیوں کی بہار بھر دی ہے، اور کرکٹر کے لیے یہ وقفہ اپنے بیٹے کے ساتھ قیمتی لمحات گزارنے کا ایک خوبصورت موقع ثابت ہو رہا ہے۔