پاکستانی شوبز کی دلکش جوڑی فلک شبیر اور سارہ خان ایک بار پھر سوشل میڈیا پر اپنی محبت کی داستان رقم کرتے نظر آئے ہیں۔ گلوکار فلک شبیر، جو اپنی اہلیہ سارہ خان کے لیے اپنے جذبات کا اظہار اکثر شاندار تحائف کے ذریعے کرتے ہیں، نے حال ہی میں ایک اور دل جیتنے والا قدم اٹھایا ہے۔
فلک نے اپنے یوٹیوب چینل پر نیا وی لاگ شیئر کرتے ہوئے سارہ خان کو دیئے گئے سرپرائز تحفے کا انکشاف کیا، جس میں وہ اپنی اہلیہ کو خوبصورت فارم ہاؤس پیش کرتے دکھائی دیتے ہیں۔ فارم ہاؤس کی جھلکیاں دیکھ کر سارہ کی خوشی کے آنسو چھلک پڑے، جب کہ فلک نے ویڈیو میں بتایا کہ وہ ڈیڑھ سال سے اس تحفے کی تیاری میں مصروف تھے۔
فارم ہاؤس کی تعمیر میں دیہاتی اور جدید طرز کا حسین امتزاج دیکھا جا سکتا ہے، جس نے اس تحفے کو اور بھی خاص بنا دیا ہے۔ یاد رہے، کہ اس سے پہلے بھی فلک شبیر نے رواں سال کے آغاز میں اپنی اہلیہ اور بیٹی عالیانہ کے لیے ایک قیمتی گاڑی تحفے میں دی تھی، جس سے ان کی محبت کی کہانی کی چمک اور بھی بڑھ گئی ہے۔
فلک اور سارہ کی یہ دلکش جوڑی اپنی زندگی کے خوشگوار لمحات کو شیئر کر کے مداحوں کے دل جیتنے کا ہنر بخوبی جانتی ہے، اور ان کی یہ خوبصورت کہانیاں سوشل میڈیا پر ہمیشہ ہی ایک نیا رنگ بھرتی ہیں۔