وفاقی وزیر داخلہ محسن نقوی نے کہا ہے کہ تعمیراتی عمل ریکارڈ مدت میں مکمل ہونے پر ایف 8 انڈر پاس منگل 24 دسمبر کو ٹریفک آمدورفت کے لیے کھول دیا جائے گا۔
وزیر داخلہ محسن نقوی نے منصوبوں کے انڈر پاسز اور فلائی اوورز کی تعمیر کے کاموں کا مشاہدہ کیا۔ چئیرمین سی ڈی اے محمد علی رندھاوا اور کنٹریکٹرز نے پراجیکٹس پر پیشرفت بارے بریفنگ دیتے ہوئے بتایا کہ منصوبوں کے فلائی اوورز اور انڈر پاس پر بیک وقت کام جاری ہے۔
انہوں نے بتایا کہ سرینا چوک انٹرچینج کا جنوری میں افتتاح ہو گا جو صرف 60 دن میں مکمل ہوگا۔ وہ ایف 8 ایکسچینج چوک انٹرچینج اور سرینا چوک انٹرچینج پراجیکٹس کے دورہ کے موقع پر گفتگو کررہے تھے۔
اسلام آباد میں تیز رفتاری سے انڈر پاس کی تعمیر کا نیا ریکارڈ
وزیر داخلہ نے ہدایت کی کہ منصوبوں کی تکمیل میں کسی بھی قسم کی رکاوٹ کو بروقت دور کیا جائے اور مقررہ مدت میں دونوں منصوبوں کی تکمیل کو ہر صورت یقینی بنایا جائے۔
انہوں نے کہا کہ منصوبوں کو ریکارڈ مدت میں مکمل کرنا ہے تاکہ اسلام آباد کے شہریوں کو جلد سے جلد ٹریفک کے مسائل سے چھٹکارا مل سکے۔