کراچی کے باسی تیار ہوجائیں! سرد ہوائیں شہر کی فضا کو مزید یخ بستہ بنانے کے لیے داخل ہوچکی ہیں۔ محکمہ موسمیات کا کہنا ہے کہ آج رات کراچی میں درجہ حرارت 9 ڈگری سینٹی گریڈ تک گر سکتا ہے۔
آج کم سے کم درجہ حرارت 10.5 ڈگری سینٹی گریڈ ریکارڈ ہوا، لیکن یہ ابھی شروعات ہے۔ ماہرین کے مطابق رات کے وقت ہوا مزید خنک ہوجائے گی اور پارہ سنگل ڈیجٹ میں جانے کا پورا امکان ہے۔ شمال مشرق سے آنے والی خشک ہوائیں شہر میں خنکی کا راج برقرار رکھیں گی۔
محکمہ موسمیات نے خبردار کیا ہے کہ تھرپارکر اور عمرکوٹ کے علاقوں میں شدید سردی کی لہر برقرار رہے گی، جہاں درجہ حرارت مزید گرنے کے امکانات ہیں۔
ماہرین کے مطابق افغانستان اور شمالی ایران میں برفباری کا ایک طاقتور مغربی سسٹم موجود ہے، جو شمال مغربی بلوچستان میں شدید ٹھنڈ لا چکا ہے۔ یہی سرد لہر آہستہ آہستہ سندھ کے ساحلی علاقوں کی جانب بڑھ رہی ہے۔
پی ڈی ایم اے کے مطابق سائبیرین خشک ہوائیں اور جھکڑ بلوچستان کے چاغی سے ہوتے ہوئے مکران کے ساحلی علاقوں تک پہنچ رہی ہیں۔ ان ہواؤں کی رفتار 48 کلومیٹر فی گھنٹہ تک ریکارڈ کی گئی ہے، جو سردی کو مزید سنگین بنا سکتی ہیں۔
کراچی کے رہائشیوں کو مشورہ ہے کہ گرم کپڑے نکال لیں کیونکہ سردی کی شدت آنے والے دنوں میں مزید بڑھنے کا امکان ہے۔