پاکستان اور جنوبی افریقہ کے درمیان کھیلی جا رہی دو ٹیسٹ میچز کی سیریز کے دوسرے ٹیسٹ میچ میں پروٹیز نے پہلے دن کے کھیل کے اختتام پر پاکستان کے خلاف چاروکٹوں کے نقصان پر 316 رنز بنائے ہیں۔
پاکستان اور جنوبی افریقہ کے درمیان کھیلی جا رہی دو ٹیسٹ میچز کی سیریز کے دوسرے ٹیسٹ میچ میں پروٹیز نے پہلے دن کے کھیل کے اختتام پر پاکستان کے خلاف چاروکٹوں کے نقصان پر 316 رنز بنائے ہیں۔
کیپ ٹاؤن میں کھیلے جا رہے دوسرے ٹیسٹ میچ میں جنوبی افریقہ نے ٹاس جیت کر پہلے بیٹنگ کا فیصلہ کیا۔
میزبان ٹیم کی پہلی وکٹ 61 رنز پر گر گئی، جنوبی افریقہ کے اوپنر ایڈن مرکرم 17 رنز بنانے کے بعد خرم شہزاد کی گیند پر وکٹ کیپر رضوان کے ہاتھوں کیچ آؤٹ ہو گئے۔
تیسرے نمبر پر آنے والے ویان مُلڈر بھی صرف پانچ رنز بنانے کے بعد 70 کے مجموعی سکور پر محمد عباس کی گیند پر رضوان کو کیچ تھما بیٹھے جبکہ تیسرے نمبر پر آنے والے ٹرسٹن سٹبز کھاتہ کھولے بغیر ہی آغا سلمان کی گیند پر رضوان کے ہاتھوں کیچ آؤٹ ہو کر پویلین لوٹ گئے۔
تاہم اس کے بعد پروٹیرز کے کپتان ٹیمبا باووما نے کریز پر آ کر ٹیم کو سہارا دیا اور نوجوان بلے باز ریان رکلٹن کے ساتھ شاندار 235 رنز کی شراکت قائم کی۔
جنوبی افریقہ کی جانب سے نوجوان بلے باز ریان رکلٹن نے شاندار بیٹنگ کا مظاہرہ کرتے ہوئے اپنے کیریئر کی دوسری سنچری سکور کی۔ انھوں نے پہلے دن کے کھیل کے اختتام پر 176 رنز بنائے اور وہ کریز پر موجود ہیں۔
انھوں نے کپتان ٹیمبا باووما کے ساتھ چوتھی وکٹ کی ناقابل شکست شراکت قائم کرتے ہوئے پاکستانی بولنگ کو آڑے ہاتھوں لیا اور پروٹیز کے دونوں بلے بازوں نے پراعتماد بیٹنگ کرتے ہوئے گراؤنڈ کے چاروں جانب دلکش سٹروکس کھیلے۔
اس موقع پر جنوبی افریقہ کے کپتان ٹیمبا باووما نے بھی شاندار کھیل پیش کرتے ہوئے اپنی سنچری مکمل کی۔ انھوں نے 106 رنز بنائے اور 307 کے مجموعے پر سلمان آغا کے ہاتھوں آؤٹ ہوئے۔
ان کے بعد آنے والے بلے باز ڈیوڈ بڈنگھام ہیں جو اس وقت چار رنز کے ساتھ کریز پر موجود ہیں۔
صائم ایوب پاؤں مڑنے سے زخمی
جنوبی افریقہ کے خلاف دوسرے ٹیسٹ کے آغاز پر پاکستان کو اس وقت دھچکا لگا جب پاکستان کے نوجوان اوپننگ بلے باز صائم ایوب ٹخنے میں چوٹ لگنے کے بعد انجرڈ ہو گئے۔
صائم ایوب فیلڈنگ کے دوران باؤنڈری لائن کے قریب پاؤں مڑنے کے باعث زخمی ہو گئے۔ کرک انفو کے مطابق شدید تکلیف کے باعث ایکسرے کے لیے انھیں ہسپتال لے جایا گیا۔
قبل ازیں پاکستان نے جنوبی افریقہ کے خلاف دوسرے ٹیسٹ کے لیے پلیئنگ الیون میں ایک تبدیلی کرتے ہوئے نسیم شاہ کی جگہ فاسٹ بولر میر حمزہ کو شامل کیا۔
واضح رہے کہ دو ٹیسٹ میچز کی سیریز کا پہلا میچ جنوبی افریقہ نے جیتا تھا۔ ٹیسٹ سیریز سے قبل جنوبی افریقہ نے تین ٹی ٹوئنٹی میچز کی سیریز 0-2 سے جیتی تھی۔ ایک میچ بارش کی وجہ سے نہیں ہوسکا تھا جبکہ اس کے بعد کھیلی گئی تین ون ڈے میچز کی سیریز میں پاکستان نے کلین سویپ کر کے فتح حاصل کی تھی۔
’پاکستان صائم ایوب کے ان فٹ ہونے کا متحمل نہیں ہو سکتا‘
پاکستانی اوپنر صائم ایوب کے د وران فیلڈنگ زخمی ہونے کے بعد سوشل میڈیا پر صارفین ان کی جلد صحتیابی کی دعا کر رہے ہیں جبکہ کچھ صارفین خراب گراؤنڈ بنانے پر بھی تنقید کر رہے ہیں۔
احتشام نامی صارف نے صائم ایوب کے پاؤں میں موچ آنے پر تبصرہ کرتے ہوئے لکھا کہ ’پاکستان صائم ایوب کے فریکچر یا سنگین انجری کا متحمل نہیں ہو سکتا ورنہ پاکستان چیمپیئنز ٹرافی میں صائم کی کمی محسوس کر سکتا ہے۔ صائم ایوب کی جلد صحت یابی کے لیے دعا کریں!‘
ایک اور صارف نے گراؤنڈ میں صائم ایوب کے گرنے کی تصاویر شیئر کرتے ہوئے ان کی جلد صحت یابی کی دعا کی اور کہا کہ ہم آپ کو چیمپیئنز ٹرافی میں چاہتے ہیں۔
https://twitter.com/MSOHAILASGHAR16/status/1875136382508859773
دوسری جانب صہیب مقصود نے آج کی اننگز میں پاکستانی بولرز کی غیر متاثر کن بولنگ پر تبصرہ کرتے ہوئے لکھا کہ ’ایسا تب ہوتا ہے جب آپ سخت فیصلہ لینے کے لیے ہمت نہیں رکھتے، آپ کو اس پچ پر نسیم شاہ اور اضافی بولر کے طور پر سپنر نعمان علی کی ضرورت تھی، پاکستان اس ٹیسٹ میچ میں ایک بیٹسمین کم کر سکتا تھا لیکن اس خشک پچ پرآپ کو سپنرر کی ضرورت تھی۔‘
https://twitter.com/sohaibcricketer/status/1875185868115521730
