دنیا کے بہترین بولرز میں سے ایک سمجھے جانے والے انڈین فاسٹ بولر جسپریت بمرا کی انڈیا کے چیمپیئنز ٹرافی سکواڈ میں شمولیت کے حوالے سے حتمی فیصلہ آج متوقع ہے۔
دنیا کے بہترین بولرز میں سے ایک سمجھے جانے والے انڈین فاسٹ بولر جسپریت بمرا کی انڈیا کے چیمپیئنز ٹرافی سکواڈ میں شمولیت کے حوالے سے حتمی فیصلہ آج متوقع ہے۔
بمرا آسٹریلیا اور انڈیا کے درمیان پانچ میچوں کی بارڈر گواسکر سیریز کے آخری میچ یعنی سڈنی ٹیسٹ میں زخمی ہو گئے تھے جس کے بعد سے وہ ایکشن میں نظر نہیں آئے۔
انڈیا کی جانب سے 18 جنوری کو جب چیمپیئنز ٹرافی کے لیے سکواڈ کا اعلان کیا گیا تھا تو میں جسپریت بمرا کا نام بھی شامل تھا تاہم انڈیا میں ان کی فٹنس پر نظر رکھی جا رہی تھی اور اس حوالے سے حتمی فیصلہ چیمپیئنز ٹرافی سے کچھ روز پہلے کیا جانا تھا۔
آئی سی سی کی جانب سے چیمپیئنز ٹرافی کے سکواڈز میں ردوبدل کے لیے 11 فروری کی ڈیڈلائن دی گئی ہے۔
جسپریت بمرا گذشتہ کئی سالوں سے تینوں فارمیٹس میں نہ صرف انڈیا بلکہ دنیا کے بہترین بولر کے طور پر سامنے آئے ہیں۔ انھوں نے اب تک 45 ٹیسٹ میچوں میں 19 کی اوسط سے 205 وکٹیں حاصل کی ہیں۔ ون ڈے کرکٹ میں 149 وکٹیں 23 کی اوسط سے حاصل کی ہیں جبکہ ٹی ٹوئنٹی کرکٹ میں بمرا نے 17 کی اوسط سے 89 وکٹیں لی ہیں۔
انڈین میڈیا کے مطابق بمرا نیشنل کرکٹ اکیڈمی ری ہیب کے لیے موجود ہیں جہاں ان کی کچھ سکینز بھی کیے گئے ہیں اور اج ان کی ٹیم میں شمولیت کا حتمی فیصلہ کیا جائے گا۔ یہ بھی ممکن ہے کہ بمرا کو سکواڈ میں شامل تو کیا جائے لیکن ٹورنامنٹ کی شروعات میں وہ ٹیم میں شامل نہ ہوں۔
انڈین مداحوں کو اس فیصلے کا بے صبری سے انتظار ہے کیونکہ بمرا حالیہ گذشتہ کئی سالوں سے بہترین بولنگ کا مظاہرہ کر رہے ہیں۔
ایک صارف نے لکھا کہ آج بی سی سی آئی نے فیصلہ کرنا ہے کہ بمرا چیمپیئنز ٹرافی کھیلیں گے یا نہیں اور ’میرا دل دھک دھک کر رہا۔‘
ایک اور صارف نے لکھا کہ ’آج تمام انڈین مداح بمرا کی سکواڈ میں شمولیت اور صحتیابی کے لیے دعا کریں گے۔‘
سنجنا نامی صارف نے لکھا کہ ’تمام نظریں بمرا پر ہیں۔‘
روہت شرما نے 90 گیندوں میں 119 رنز بنائے جس میں سات چھکے شامل تھےاس سے قبل انڈیا کو اپنے کپتان روہت شرما کی فارم میں واپسی سے حوصلہ ملا ہے۔ روہت شرما نے انگلینڈ کے خلاف دوسرے ون ڈے انٹرنیشنل میں سنچری سکور کر کے اپنے ناقدین کو خاموش کروا دیا ہے جو اب ان کی ریٹائرمنٹ کا مطالبہ کروا رہے تھے۔
روہت شرما گذشتہ تقریباً ایک سال سے بھی زائد عرصے سے فارم کے لیے جدوجہد کر رہے تھے اور اگلے ہفتے پاکستان میں شروع ہونے والی چیمپیئنز ٹرافی سے قبل اُن کی یہ سنچری انڈیا کے لیے کسی نیک شگون سے کم نہیں سمجھی جا رہی۔
انڈین میڈیا میں انڈیا اور آسٹریلیا کو چیمپیئنز ٹرافی کے لیے فیورٹ قرار دیا جا رہا ہے اور اس کے ساتھ روہت شرما کا فارم میں واپس آنا انڈین ٹیم کے لیے کسی تحفے سے کم نہیں سمجھا جا رہا اور اس کا اظہار سوشل میڈیا پر بھی ہو رہا ہے۔
یاد رہے کہ اتوار کے روز انڈیا کی مشرقی ریاست اڑیسہ کے شہر کٹک میں انڈیا اور انگلینڈ کے درمیان ہونے والے دوسرے ایک روزہ میچ میں انگلینڈ کو ایک بار پھر شکست کا سامنا کرنا پڑا ہے اور اس طرح انڈیا نے تین ایک روزہ میچوں کی سیریز میں دو صفر سے جیت لی تھی۔
یہ روہت شرما کی انڈیا کے لیے 11 ماہ کے وقفے کے بعد پہلی سنچری تھی۔
روہت شرما اور جوز بٹلر ٹرافی کے ساتھانگلینڈ کے کپتان جوز بٹلر نے روہت شرما کی اننگز کو ’بہترین‘ قرار دیا جبکہ روہت کے ساتھ اوپننگ کرنے والے شبھمن گل نے میچ کے بعد کہا کہ ’روہت کے ساتھ بیٹنگ کرنا بہت آسان ہو جاتا ہے۔ روہت نے گیند کے ساتھ جو سلوک کیا وہ اچھا تھا۔ جس طرح سے انھوں نے تیز بولرز کو ڈومینیٹ کیا اسے نان سٹرائیکر اینڈ سے دیکھنا بہت اچھا تھا۔‘
جبکہ روہت شرما نے کہا کہ ’ٹیم کے لیے کچھ رنز بنانا بہت اچھا تھا۔‘
اس سے قبل ناگپور میں ہونے والے پہلے ون ڈے میں انڈیا نے انگلینڈ کو چار وکٹوں سے شکست دی تھی۔ انگلینڈ کا دورہ انڈیا مہمان ٹیم کے لیے کچھ اچھا نہیں رہا ہے۔ پہلے وہ پانچ ٹی 20 میچوں کی سیریز چار کے مقابلے ایک سے ہار گئے اور اب ایک روزہ سریز بھی انڈیا کی نام ہوئی ہے۔
برینڈن مکلم کی کوچنگ میں دورہ کرنے والی انگلینڈ ٹیم سے خاصی امید تھی۔ اگرچہ ابھی ایک میچ ہونا باقی ہے جسے انگلینڈ چیمپیئنز ٹرافی سے قبل اپنے کھلاڑیوں کے مورال کو بلند کرنے کے لیے جیتنا چاہے گا جبکہ دوسری جانب انڈیا ناقابل شکست رہ کر اپنے حوصلوں کو بلند رکھنے کی کوشش کرے گا۔
سوشل میڈیا پر روہت کی تعریف
معروف انڈین کرکٹر منوج تیواری نے لکھا کہ ’یہ دیکھنا باقی تھا۔ روہت شرما کلاسک انداز میں اپنے ناقدین کو جواب دینا جانتے ہیں۔ کپتان نے میچ جیتنے والی شاندار اننگز کھیلی ہے۔ بہت خوب۔ اور کیا ہی شاندار جیت ہے انڈین ٹیم کی۔‘
بہت سے لوگ روہت شرما کے ایک اور ریکارڈ کی جانب اشارہ کر رہے ہیں۔ وہ لکھ رہے ہیں بین الاقوامی کرکٹ میں روہت شرما نے اوپنر کے طور پر سچن تنڈولکر کا ریکارڈ عبور کر لیا ہے اور اب صرف شیکھر دھون اُن سے آگے ہیں۔
ایک صارف نے لکھا کہ کچھ لوگ روہت شرما کے جانے کی بات کر رہے تھے۔ لیکن روہت شرما نے انگلینڈ کے خلاف اپنی سنچری کے ساتھ جواب دیا کہ ’میں کہیں نہیں جا رہا۔‘
سابق کرکٹر یوراج سنگھ نے ایکس پر لکھا: ’انھوں نے شاندار انداز میں واپسی کی ہے۔ آپ ہٹ مین (روہت شرما کے لیے استعمال ہونے والا لفظ) کو زیادہ دنوں تک خاموش نہیں رکھ سکتے۔ بیٹ سے دھماکے دار اننگز جس میں ان کا بیٹ ہی بول رہا تھا۔‘
چیمپیئنز ٹرافیچیمپیئنز ٹرافی کے لیے فیورٹ
سابق انڈین کرکٹر اور کمنٹیٹر روی شاستری اور سابق آسٹریلین کپتان اور کمنٹیٹر رکی پونٹنگ نے گذشتہ ہفتے ایک گفتگو کے دوران آئی سی سی چیمپئنز ٹرافی کے لیے انڈیا اور آسٹریلیا کو فیورٹ قرار دیا ہے جبکہ انگلینڈ اور جنوبی افریقہ کو سیمی فائنل کا مضبوط دعویدار کہا گیا ہے۔ اس کے ساتھ ہی انھوں نے پاکستان کو کسی بھی وقت الٹ پھیر کرنے والا ملک بتایا ہے۔
اگر انگلینڈ کے خلاف انڈین ٹیم کی موجودہ کارکردگی کو دیکھا جائے تو اس کے پاس بولنگ میں جسپریت بمراہ کے علاوہ فاسٹ اور سپنر بولرز کا ایک اچھا مکس ہے جبکہ بیٹنگ میں تقریبا تمام کھلاڑی فارم میں نظر آتے ہیں۔ سریش اییر نے دونوں میچوں میں جارحانہ بیٹنگ کی ہے جبکہ آل راؤنڈر اکشر پٹیل نے بھی دونوں میچوں میں ذمہ دارانہ بیٹنگ کی ہے۔
جہاں تک انگلینڈ کا سوال ہے تو اس کی ون ڈے میں کارکردگی بہت اچھی نظر نہیں آتی۔ سنہ 2023 میں 50 اوور کے عالمی چیمپیئن کے طور پر دستبردار ہونے کے بعد سے انگلینڈ لگاتار چار ون ڈے سیریز ہار چکی ہے اور ان کی مشکلات ختم ہونے کے بجائے مزید گہری ہوتی جا رہی ہیں۔
دوسری جانب پاکستان سہ فریقی سیریز میں نیوزی لینڈ سے ابتدائی میچ ہارا ہے اور اس کی بیٹنگ اس کے لیے تشویش کا باعث ہے جبکہ نیوزی لینڈ کے خلاف آخری اوورز میں بولنگ بھی بکھرتی نظر آئی ہے۔
پاکستان کو اگرچہ گھریلو پچز کا فائدہ ہو گا لیکن ان پر اپنے ہی میدانوں میں کچھ اچھا کرنے کا دباؤ بھی ہو گا اور یہ وقت ہی بتائے گا کہ کپتان محمد رضوان اور اُن کی ٹیم پاکستانیوں کی امیدوں پر کس طرح پورا اُترتے ہیں۔
