ترک صدر رجب طیب اردوغان آج بدھ کو سرکاری دورے پر اسلام آباد پہنچیں گے۔پاکستان کے دفتر خارجہ کی جانب سے جاری بیان کے مطابق صدر اردوغان پاکستان ترکیہ ہائی لیول سٹریٹیجک تعاون کونسل کے اجلاس کی وزیراعظم شہباز شریف کے ساتھ مشترکہ سربراہی کریں گے جس کا فوکس دوطرفہ تجارت، سرمایہ کاری اور دوسرے ترجیحی سیکٹرز ہوں گے۔ کونسل کے اجلاس کے دوران کئی معاہدوں پر دستخط بھی ہوں گے۔’پاکستان، ترکیہ ہائی لیول کواپریشن کونسل‘ کا قیام 2009 عمل میں لایا گیا تھا۔
اس کونسل کے تحت کئی مشترکہ قائمہ کمیٹیاں اہم سکیٹرز بشمول تجارت، سرمایہ کاری، بینکنگ، فنانس، ثقافت، سیاحت، توانائی، دفاع، زراعت اور دیگر شعبوں میں دوطرفہ تعاون کی نگرانی کرتے ہیں۔
کونسل کے قیام کے بعد سے اب تک اس کے چھ سیشن ہوچکے ہیں۔ کونسل کا آخری اجلاس 2020 میں اسلام آباد میں منعقد ہوا تھا۔دفتر خارجہ کے مطابق سیشن کے اختتام پر مشترکہ اعلامیہ جاری کیا جائے گا اور کئی ایک معاہدوں اور مفاہمت کی یادداشتوں پر دستخط کیے جائیں گے۔بیان میں کہا گیا ہے کہ صدر اردوغان صدر زرداری سے ملاقات کریں گے اور پاکستان ترکیہ بزنس اینڈ انوسٹمنٹ فورم سے بھی خطاب کریں گے۔’ترک صدر کا دورہ اور ایس ایل ایس سی سی کے ساتویں سیشن کا انعقاد دونوں ممالک کے درمیان برادرانہ تعلقات کو مزید مضبوط کرے گا اور دونوں ممالک کے درمیان کئی جہتی تعاون مزید گہرا ہو جائے گا۔‘ترکیہ اور پاکستان کے تعلقات گرم جوشی پر مبنی ہیں اور گذشتہ سال ترک وزیرخارجہ کے دورہ اسلام آباد کے دوران دونوں ممالک نے دو طرفہ تجارت کے حجم کو 5 ارب ڈالر تک بڑھانے پر اتفاق کیا تھا۔