چیئرمین پی سی بی محسن نقوی کا کہنا ہے کہ کھلاڑیوں کی فزیکل ٹریننگ کے لیے ٹریننرز کی دستیابی یقینی بنائی جائے گی۔
پی سی بی کی جانب سے بتایا گیا ہے کہ اتوار کو چیئرمین پی سی بی محسن نقوی سے ڈومیسٹک کرکٹ میں بہترین کارکردگی دکھانے والے کھلاڑیوں نے لاہور میں ملاقات کی۔
محسن نقوی نے کھلاڑیوں سے کرکٹنگ سکلز، پرفارمنس، ڈائٹ پلان، فٹنس اور ٹریننگ کے امور کے بارے تفصیلی بات چیت کی۔
کھلاڑیوں نے ہائی پرفارمنس سنٹرز میں تربیت، ڈائٹ پلان اور فٹنس کے مسائل کے بارے میں آگاہ کیا۔
چئیرمین پی سی بی محسن نقوی نے کھلاڑیوں کی حوصلہ افزائی کی اور ان کے مسائل کے حل کے لیے متعلقہ حکام کو ہدایات دیں۔ انہوں نے تمام اکیڈمیز تک ان سٹار کھلاڑیوں کو رسائی دینے کا فیصلہ کیا اور کھلاڑیوں کی فنٹس کے لیے خصوصی طور پر ڈائٹ پلان تیار کرنے کی ہدایت کی۔
اس موقع پر محسن نقوی نے کہا کہ ’کھلاڑیوں کی فزیکل ٹریننگ کے لیے ٹریننرز کی دستیابی یقینی بنائی جائے گی۔ آپ پاکستان کے مستقبل کے سٹارز ہیں۔‘
انہوں نے کھلاڑیوں سے کہا کہ ’آپ کے لیے وسائل کی فراہمی پاکستان کرکٹ کے روشن مستقبل پر سرمایہ کاری ہے۔‘
چئیرمین پی سی بی محسن نقوی نے کھلاڑیوں کی تجاویز کو نوٹ کیا اور موقع پر ہی احکامات جاری کیے۔
ملاقات کرنے والے کھلاڑیوں میں محمد علی، علی رضا، احمد دانیال، نثار احمد، محمد ابتسام، محمد سلمان، آفاق آفریدی اور عبدالصمد شامل تھے۔
سعد مسعود، خواجہ نافع، معاذ صداقت، عرفات منہاس، مبشر خان۔ حیدر علی، حسان نواز، فیصل اکرم، طاہر بیگ اور قاسم اکرم بھی ملاقات کرنے والوں میں شامل تھے۔