صوبہ خیبر پختونخوا میں سکیورٹی فورسز کی خفیہ معلومات کی بنیاد پر کی گئی دو کارروائیوں میں نو شدت پسند ہلاک، جبکہ دو فوجی جان سے گئے۔سنیچر کو پاکستانی فوج کے شعبہ تعلقات عامہ (آئی ایس پی آر) کی جانب سے جاری پریس ریلیز کے مطابق ’ضلع مہمند میں خوارجیوں کی موجودگی کی اطلاع پر کارروائی کی گئی اور فائرنگ کے تبادلے میں سات خوارجی ہلاک ہوئے۔‘’تاہم شدید فائرنگ کے تبادلے میں ضلع مالاکنڈ سے تعلق رکھنے والے حوالدار محمد زاہد اور ضلع چترال کے سپاہی آفتاب علی شاہ جان سے گئے۔‘ڈیرہ اسماعیل خان میں کیے گئے دوسرے آپریشن میں بھی فائرنگ کے تبادلے میں دو شدت پسند ہلاک ہوئے۔شدت پسندوں کے قبضے سے ہتھیار بھی برآمد ہوئے جو علاقے میں متعدد ’دہشت گرد‘ کارروائیوں میں سرگرم تھے۔مزید کہا گیا کہ علاقے میں شدت پسندوں کے خاتمے کے لیے تلاش جاری ہے اور پاکستان کی سکیورٹی فورسز دہشت گردی کو جڑ سے اکھاڑنے کے لیے پرعزم ہیں۔