امریکی کانگریس کے ایک وفد نے جیک برگمین کی قیادت میں تھامس سوزی اور جوناتھن جیکسن کے ہمراہ اتوار کو چیف آف آرمی سٹاف جنرل عاصم منیر سے ملاقات کی ہے۔
پاکستانی فوج کے شعبہ تعلقات عامہ (آئی ایس پی آر) کی جانب سے جاری ہونے والے بیان کے مطابق ملاقات کے دوران باہمی دلچسپی کے متعدد امور پر تبادلہ خیال کیا گیا، خاص طور پر علاقائی سلامتی اور دفاعی تعاون پر زور دیا گیا۔
’دونوں فریقوں نے باہمی احترام، مشترکہ اقدار اور تزویراتی مفادات کو یکجا کرنے پر مبنی پائیدار روابط کی اہمیت کا اعادہ کیا۔‘
بیان کے مطابق ’پاکستان کے دورے پر آئے ہوئے امریکی قانون سازوں نے دہشت گردی کے خلاف جنگ میں اہم کردار ادا کرنے پر پاکستان کی مسلح افواج کی تعریف کی اور علاقائی امن و استحکام کے لیے پاکستان کی لازوال خدمات کا اعتراف کیا۔‘
پاکستان کی خودمختاری کے لیے اپنے احترام کو اجاگر کرتے ہوئے امریکی کانگریس کے وفد نے وسیع البنیاد دوطرفہ تعاون بالخصوص سلامتی، تجارت، سرمایہ کاری اور اقتصادی ترقی کے شعبوں میں آگے بڑھانے کے لیے مضبوط عزم کا اظہار کیا۔
ملاقات کے دوران باہمی دلچسپی کے متعدد امور پر تبادلہ خیال کیا گیا، خاص طور پر علاقائی سلامتی اور دفاعی تعاون پر زور دیا گیا۔ (فوٹو: آئی ایس پی آر)
اس موقع پر آرمی چیف جنرل عاصم منیر نے وفد کو ان کے دورے پر خراج تحسین پیش کیا اور پاکستان کی امریکہ کے ساتھ اپنی دیرینہ شراکت داری کو مزید گہرا اور متنوع بنانے کی خواہش کا اعادہ کیا۔
اس ملاقات کے دوران انفارمیشن ٹیکنالوجی کے شعبے میں تربیتی تعاون کے لیے ایم او یوز پر بھی دستخط کیے گئے۔