وفاقی حکومت کی جانب سے مالی سال 2025-26 کا سالانہ بجٹ آج شام چار بجے قومی اسمبلی میں پیش کیا جائے گا جس کا تخمینہ 17,600 ارب روپے سے زائد لگایا گیا ہے۔ وفاقی وزیر خزانہ محمد اورنگزیب ایوان میں آج بجٹ پیش کریں گے۔
اس سے قبل وزیراعظم شہباز شریف کی زیرِ صدارت کابینہ کا خصوصی اجلاس ہو گا جس میں بجٹ کے مسودے اور سرکاری ملازمین کی تنخواہوں و پنشن میں اضافے کی تجاویز کی منظوری دی جائے گی۔
وزارت خزانہ حکام کے مطابق بجٹ میں جہاں محصولات کے اہداف اور مالی خسارے سے نمٹنے کی حکمت عملی شامل ہے وہیں تنخواہوں، پنشن، صنعتی ترقی، توانائی کی بچت اور معیشت کی بحالی کے لیے متعدد پالیسی اقدامات بھی تجویز کیے گئے ہیں۔
ابتدائی اطلاعات کے مطابق سرکاری ملازمین کے لیے 10 فیصد تنخواہوں اور پنشن میں اضافے کے ساتھ گریڈ 1 تا 16 کے لیے 30 فیصد ڈسپیرٹی الاؤنس کی تجویز زیرِ غور ہے۔
بجٹ میں ایف بی آر کی جانب سے 14,307 ارب روپے کے محصولات اکٹھا کرنے کا ہدف رکھا گیا ہے، جن میں 6,470 ارب روپے ڈائریکٹ ٹیکس، 4,943 ارب روپے سیلز ٹیکس، 1,741 ارب روپے کسٹمز ڈیوٹی اور 1,311 ارب روپے پٹرولیم لیوی شامل ہیں۔
نان ٹیکس آمدن کا تخمینہ 2,584 ارب روپے لگایا گیا ہے جبکہ آئندہ سال سود کی ادائیگیوں کے لیے 8,685 ارب روپے مختص کیے جائیں گے۔
دفاعی اخراجات 2,414 ارب روپے جبکہ وفاقی ترقیاتی پروگرام (پی ایس ڈی پی) کے لیے 1,065 ارب روپے خرچ کیے جائیں گے۔
توانائی کے شعبے میں بجلی کی بچت کے لیے حکومت نے بلاسود اقساط پر انرجی سیور پنکھوں کی فراہمی کا اعلان کرنے کا منصوبہ بنایا ہے جس کا مقصد بجلی کے بوجھ میں کمی لانا ہے۔ یہ پنکھے صارفین بجلی کے بلوں کے ذریعے آسان اقساط میں حاصل کر سکیں گے۔
الیکٹرک گاڑیوں کے فروغ کے لیے پٹرول اور ڈیزل سے چلنے والی گاڑیوں پر پانچ سالہ لیوی نافذ کرنے کی تجویز دی گئی ہے جس سے حاصل ہونے والا ریونیو نئی الیکٹرک وہیکل پالیسی 2026-30 پر خرچ کیا جائے گا۔
لیپ ٹاپ اور سمارٹ فونز کی بیٹریز اور چارجرز کی مقامی تیاری کے لیے بھی مراعات متوقع ہیں۔
ٹیکس نیٹ کو وسعت دینے اور پوائنٹ آف سیلز سسٹم کو مؤثر بنانے کے لیے ایف بی آر نے رجسٹرڈ ریٹیلرز کی تعداد 39 ہزار سے بڑھا کر 70 لاکھ کرنے کا ہدف رکھا ہے۔
جبکہ ٹیکس چوری میں ملوث افراد پر 5 لاکھ سے بڑھا کر 50 لاکھ روپے تک جرمانے کی تجاویز ہیں۔ ٹیکس چور ریٹیلرز کی نشاندہی کرنے والوں کو انعام دینے کی سکیم بھی شامل ہے۔