صدر مملکت آصف علی زرداری نے ایوانِ صدر اسلام آباد میں منعقدہ بینظیر ہنرمند پروگرام کی افتتاحی تقریب سے خطاب کرتے ہوئے کہا کہ یہ پروگرام نوجوان نسل کے لیے روشن مستقبل کی نوید ہے۔ انہوں نے کہا کہ بچوں اور بچیوں کو صرف تعلیم ہی نہیں بلکہ ہنر بھی فراہم کیا جا رہا ہے، تاکہ وہ باعزت روزگار حاصل کر سکیں۔
صدرمملکت نے کہا کہ پروگرام کے تحت کمپیوٹر، جدید تعلیم اور مختلف ہنر سکھائے جائیں گے، جن کے ذریعے نوجوان پاکستان کے اندر اور باہر اپنے پیروں پر کھڑے ہو سکیں گے۔ ان کا کہنا تھا کہ ”نرسنگ جیسے شعبے کی دنیا بھر میں بڑی مانگ ہے اور ہم چاہتے ہیں کہ ہمارے نوجوان ہنر سیکھ کر دیارِ غیر میں ملک کا نام روشن کریں۔“
صدر زرداری نے وفاقی وزیر نوید قمر کی کوششوں کو بھی سراہا اور کہا کہ اس وقت ملک کو ایسے اقدامات کی ضرورت ہے جو نوجوانوں کو خود مختار اور ہنرمند بنائیں۔ انہوں نے کہا کہ حکومت بچوں کو تمام بنیادی حقوق فراہم کرنے کے لیے پرعزم ہے اور یہ پروگرام اس سلسلے کی ایک عملی مثال ہے۔