ایف بی آر نے انکم ٹیکس ریٹرن جمع کرانے کی آخری تاریخ میں توسیع نہ کرنے کا اعلان کر دیا ہے۔ ایف بی آر کے مطابق سال 2025 کے لیے انکم ٹیکس گوشوارے 30 ستمبر تک جمع کرانا لازمی ہوگا اور اس تاریخ کے بعد ریٹرن جمع نہ کرانے والوں کو قانون کے مطابق لیٹ فائلر کا درجہ دیا جائے گا جبکہ ان پر جرمانے بھی عائد ہوں گے۔
ایف بی آر کی جانب سے جاری اعلامیہ میں کہا گیا ہے کہ تاریخ میں توسیع سے متعلق تمام خبریں بے بنیاد اور گمراہ کن ہیں۔ ادارے نے واضح کیا ہے کہ شدید مجبوری کی صورت میں ٹیکس دہندگان کمیٹی کی منظوری سے زیادہ سے زیادہ 15 روز کی توسیع حاصل کر سکتے ہیں تاہم اس کے لیے ضروری ہوگا کہ واجب الادا ٹیکس 30 ستمبر 2025 تک جمع کرا دیا جائے۔
بیان میں مزید کہا گیا کہ ریٹرن فائلنگ کے لیے آئی آر ایس سسٹم مکمل طور پر فعال ہے اور اس کے سست روی کا دعویٰ بھی غلط ہے۔ ایف بی آر کے مطابق زیادہ تر ٹیکس دہندگان ایسے علاقوں میں رہتے ہیں جو حالیہ سیلاب سے متاثر نہیں ہوئے اور انہیں گوشوارے جمع کرانے کے لیے پہلے ہی کافی وقت دیا گیا تھا۔
اعلامیہ میں بتایا گیا کہ نئے اور سادہ انکم ٹیکس ریٹرن فارم کے ذریعے فائلنگ کا عمل مزید آسان بنا دیا گیا ہے۔ ایف بی آر نے شہریوں کو ہدایت کی ہے کہ وہ مقررہ تاریخ تک درستگی اور ایمانداری کے ساتھ اپنے ٹیکس ریٹرن جمع کرائیں تاکہ کسی قانونی کارروائی یا جرمانے سے بچ سکیں۔