بینک آف خیبر نے کوئک پے کے ساتھ شراکت داری میں پوائنٹ آف سیل (POS) ایکوائرنگ سروسز کا آغاز کردیا ہے۔ یہ اقدام بینک کے ڈیجیٹل تبدیلی کے سفر میں ایک اہم سنگ میل ہے جو پاکستان میں جدید پیمنٹس انفراسٹرکچر کو فروغ دینے کا عزم ظاہر کرتا ہے۔
افتتاحی تقریب میں منیجنگ ڈائریکٹر اور سی ای او بینک آف خیبر حسن رضا اور کوئک پے کے منیجنگ ڈائریکٹر ارباب علی خان سمیت دونوں اداروں کے اعلیٰ افسران نے شرکت کی۔ اس شراکت داری کے تحت بینک آف خیبر اپنے مرچنٹس نیٹ ورک کو جدید POS سہولیات فراہم کرے گا جس سے ڈپازٹس میں اضافہ، فیس پر مبنی آمدنی میں وسعت اور مارکیٹ میں مزید رسائی حاصل ہوگی۔
اس سہولت سے تاجر اور صارفین محفوظ ڈیجیٹل ادائیگیوں، بہتر سہولت اور نقد پر انحصار میں کمی کی صورت میں مستفید ہوں گے۔ یہ اقدام "کیش لیس خیبر پختونخوا" منصوبے اور پاکستان کے مالیاتی نظام کی ڈیجیٹلائزیشن سے ہم آہنگ ہے۔
اس سنگ میل کے ساتھ بینک آف خیبر نے ایک جدید، ٹیکنالوجی سے ہم آہنگ مالیاتی ادارے کے طور پر اپنی حیثیت کو مزید مستحکم کیا ہے جو مالی شمولیت کو فروغ دینے اور ملک میں ڈیجیٹل بینکاری کے مستقبل کو تشکیل دینے کے لیے پرعزم ہے۔