امیر المؤمنین حضرت علی المرتضیٰ رضی اﷲ عنہ۔۔۔۔۔۔۔علم وحکمت کے مہر درخشاں

(Muhammad Riaz Alimi, Karachi)

خلیفۂ چہارم ، جانشینِ رسول ، زوجِ بتول حضرت سیدنا علی المرتضی رضی اﷲ عنہ عام الفیل کے تیس (۳۰) سال بعد ۱۳ رجب المرجب کو پیدا ہوئے۔ بچوں میں ایمان لانے میں سبقت کا سہرا آپ کے سر ہے۔ زمانۂ طفلی سے ہی رسول اﷲ ﷺ کی زیرِ تربیت رہے اور آپ ﷺ کی حیات ظاہری تک آپ ﷺ کی مدد و نصرت اور دین اسلام کی حمایت میں مصروف رہے۔ حضرت علی رضی اﷲ عنہ کی ذاتِ گرامی بہت سے کما لات اورخوبیوں کی جامع ہے۔ حضرت علی رضی اﷲ عنہ جراأت ، شجاعت، بہادری، سخاوت، سمیت علم وحکمت کے دریا اپنے اندر سموئے ہوئے تھے۔آپ سید العرب، صاحب ذوالفقار،حیدر کرار، میدانِ خطابت کے شہسوار اور قاضیٔ برحق بھی تھے۔

حضرت علی رضی اﷲ عنہ میدان علم میں علمائے صحابہ میں بہت اونچا مقام رکھتے تھے۔ رسول اﷲ ﷺ نے آپ رضی اﷲ عنہ کو علم و حکمت کا باب یعنی دروازہ فرمایا: حضرت عبد اﷲبن عباس رضی اﷲعنہما بیان کرتے ہیں کہ حضور نبی اکرم ﷺنے فرمایا :میں علم کا شہر ہوں اور علی اس کا دروازہ ہے۔ لہٰذا جو اس شہر میں داخل ہونا چاہتا ہے اسے چاہیے کہ وہ اس دروازے سے آئے۔ (المستدرک للحاکم) اسی طرح ایک اور روایت میں سرکارِ مدینہ ﷺ نے حضرت علی رضی اﷲ عنہ حکمت کا دروازہ قرار دیا۔ چنانچہ نبی کریم ﷺ نے ارشاد فرمایا: میں حکمت کا گھر ہوں اور علی اس کا دروازہ ہیں۔ (ترمذی)

حضرت علی رضی اﷲ عنہ بیان کرتے ہیں کہ میں نے بارگاہِ رسالت میں عرض کی : مجھے نصیحت فرمایئے! ارشاد فرمایا: کہو! میرا رب اﷲ تعالیٰ ہے، پھر اس پر قائم رہو۔ میں نے کہا: میرا رب اﷲ تعالیٰ ہے اور میری توفیق اسی کی طرف سے ہے ۔ میں نے اسی پر بھروسہ کیا اور اسی کی طرف رجوع کرتا ہوں۔ آپ ﷺ نے ارشاد فرمایا: اے ابو حسن! تمہیں علم مبارک ہو۔ تم نے علم کے سمندر سے پی پی کر پیاس بجھائی۔ (ابن عساکر) علم سکھانے والے جب علم کا شہر یعنی مصطفیﷺ ہوں تو اس علم کی کیفیت کیا ہوگی۔ اس علم کی انتہا کہاں ہوگی۔یقینا اس علم کے اسرار و رموز کا اندازہ نہیں لگایا جا سکتا۔ اس علم کی گہرائیوں کو نہیں ناپا جاسکتا۔ اس کی وسعتوں کو نہیں سمیٹا جاسکتا۔ رسول اﷲ ﷺ نے جتنا چاہا اﷲ کے حکم سے حضرت علی رضی اﷲ عنہ کو علم سکھایا۔حضرت علی رضی اﷲ عنہ بیان کرتے ہیں کہ رسول اﷲ ﷺ نے مجھ سے فرمایا: اے علی! مجھے اﷲ تعالیٰ نے حکم دیا ہے کہ میں تمہیں قریب کروں اور علم سکھاؤں تاکہ تم اسے یاد رکھو۔(الفردوس بماثور الخطاب) رسول اﷲ ﷺ نے قرآن کا حضرت علی رضی اﷲ عنہ کے ساتھ تعلق بیان کرتے ہوئے ارشاد فرمایا:علی قرآن کے ساتھ ہے اور قرآن علی کے ساتھ ہے یہ دونوں (اس طرح جڑے رہیں گے اور) جدا نہیں ہوں گے حتی کہ حوض کوثر پر مل کر میرے پاس آئیں گے۔ (المستدرک للحاکم) گویا کہ رسول اﷲ ﷺ نے حضرت علی ر ضی اﷲ عنہ اور قرآن کو لازم و ملزوم قراردیا ۔ یہ روایت اس بات کی وضاحت کرتی ہے کہ حضرت علی کو قرآن کا علم دیا گیا تھا۔ قرآن ایک ایسی کتاب ہے جس میں ہر خشک و تر کا ذکر موجود ہے۔ ہر چیز کا علم اس میں سمایا ہوا ہے اور حضرت علی قرآن کے ظاہری اور باطنی علوم کے جاننے والے تھے۔ قرآن کے اسرار و رموز سے واقف تھے۔ یہی وجہ ہے کہ ایک مرتبہ آپ رضی اﷲ عنہ نے ارشاد فرمایا: اگر میں چاہوں تو سورۃ الفاتحہ کی تفسیر سے ستر(۷۰) اونٹ بھر دوں ۔ (قوت القلوب) یعنی باب العلم کا حال یہ ہے کہ اگر وہ سورۃ الفاتحہ کی تفسیر لکھنا شروع کریں تو علوم و معرفت کے دریا بہادیں ، قرآن کے اسرارو رموز منکشف کرتے چلے جائیں ور اتنی تفسیر ضبط تحریرمیں لے آئیں کہ ستر اونٹ اس کے وزن سے بھر جائیں۔حضرت عبداﷲ بن مسعود رضی اﷲ عنہ فرماتے ہیں : بے شک قرآن مجید سات حروف پر اُترا ہے اور ان میں سے ہر حرف کا ظاہر بھی ہے اور باطن بھی اور امیر المؤمنین حضرت علی رضی اﷲ عنہ ایسے عالم ہیں جن کے پاس ظاہر و باطن دونوں کا علم ہے۔ (ابن عساکر)اسی بناء پر حضرت علی رضی اﷲ عنہ نے فرمایا تھا:میں قرآن کی ہر آیت کے بارے میں جانتا ہوں کہ وہ کس کے بارے، کس جگہ اور کس پر نازل ہوئی بے شک میرے رب نے مجھے بہت زیادہ سمجھ والا دل اور فصیح زبان عطا فرمائی ہے۔ (حلیۃ الاولیاء) حضرت ابوطفیل رضی اﷲ عنہ روایت کرتے ہیں کہ حضرت علی رضی اﷲ عنہ نے فرمایا :مجھ سے کتاب اﷲ کے بارے سوال کرو پس بے شک کوئی بھی آیت ایسی نہیں ہے جس کے بارے میں میں یہ نہ جانتا ہوں کہ وہ دن کو نازل ہوئی یا رات کو، پہاڑ میں نازل ہوئی یا میدان میں۔ (الطبقات الکبریٰ )

آپ رضی اﷲ عنہ کی علمی شان یہ تھی کہ منبر پرکھڑے ہوکر فرمایا کرتے تھے کہ مجھ سے جوکچھ پوچھنا چاہو پوچھ لو۔ حضرت سعید بن مسیب رضی اﷲ عنہ فرماتے ہیں کہ حضور نبی کریم ﷺ کے صحابہ میں سوائے حضرت علی رضی اﷲ عنہ کے کوئی یہ کہنے والا نہیں تھا کہ جو کچھ پوچھنا ہو مجھ سے پوچھ لو۔ (الریاض النضرۃ) آ پ کے زمانے میں مقدمات میں فیصلہ کرنے میں آپ کا کوئی ثانی نہیں تھا۔ کوئی بھی مسئلہ درپیش ہوتاتو آپ کی نگاہیں اس کی گہرائی تک پہنچ جاتیں اور حق کے ساتھ وہ فیصلہ فرماتے کہ سب دیکھتے رہ جاتے۔ آپ کی حکمت، فراست، دانائی کا عالم یہ تھا کہ پیچیدہ در پیچیدہ مقدمہ بھی آپ کی خدمت میں پیش ہوتا تو اپنی دانائی اسے انتہائی آسانی کے ساتھ اس مقدمہ کی عُقدہ کشائی کرلیتے۔ آپ رضی اﷲ عنہ کو حکمت و دانائی کا کثیر ترین حصہ عطا کیا گیا تھا۔ حضرت عبد اﷲ بن مسعود رضی اﷲ عنہ فرماتے ہیں: میں رسول اﷲ ﷺ کی بارگاہ میں حاضر تھا ، کسی نے حضرت علی المرتضیٰ رضی اﷲ عنہ کے بارے میں دریافت کیا تو آپ ﷺ نے ارشاد فرمایا: حکمت و دانائی کو دس (۱۰)حصوں میں تقسیم کیا گیا، نو(۹) حصے حضرت علی کو اور ایک حصہ لوگوں کو عطا کیا گیا۔ (ابن عساکر)حضرت عبد اﷲ بن مسعود رضی اﷲ عنہ فرماتے ہیں کہ مدینہ میں علم فرائض اور مقدمات کے فیصلہ کرنے میں حضرت علی رضی اﷲ عنہ سے زیادہ علم رکھنے والا کوئی دوسرا نہیں تھا اور حضرت عائشہ صدیقہ رضی اﷲ عنہا کے سامنے حضرت علی رضی اﷲ عنہ کا ذکر ہوا تو آپ رضی اﷲ عنہا نے فرمایا: علی سے زیادہ مسائل شرعیہ کا جاننے والا کوئی اور نہیں ہے۔ (الریاض النضرۃ)حضرت علی رضی اﷲ عنہ کا علمی مرتبہ اتنا بلند تھا کہ آپ کے زمانے میں بھی آپ کے پائے کا کوئی عالم موجود نہیں تھا۔حضرت علی المرتضیٰ رضی اﷲ عنہ کی شہادت کے بعد حضرت حسن رضی اﷲ عنہ نے خطبہ ارشاد فرمایااور کہا کہ گزشتہ کل تم سے وہ ہستی جدا ہو گئی ہے جن سے نہ تو گذشتہ لوگ علم میں سبقت لے سکے اور نہ ہی بعد میں آنے والے ان کے مرتبہ علمی کو پا سکیں گے۔ (مسندِ احمدبن حنبل)

Comments Print Article Print
 PREVIOUS
NEXT 
About the Author: Muhammad Riaz Alimi

Read More Articles by Muhammad Riaz Alimi: 75 Articles with 35246 views »
Currently, no details found about the author. If you are the author of this Article, Please update or create your Profile here >>
06 Jun, 2018 Views: 406

Comments

آپ کی رائے