یوسف سلیم٬ پاکستان کے پہلے نابینا جج

یوسف سلیم بینائی سے محروم ایسے وکیل ہیں جو دو روز قبل پاکستان کے سب سے پہلے نابینا جج بن گئے ہیں- منگل کے روز یوسف سلیم نے اپنے نئے عہدے کا حلف اٹھایا ہے-

لاہور سے تعلق رکھنے والے یوسف سلیم کو پہلے اہلیت رکھنے کے باوجود مسترد کردیا گیا تھا- لیکن چیف جسٹس آف پاکستان جناب میاں ثافب نثار کی مداخلت کے بعد ان کی دوبارہ سول جج کی پوزیشن کے لیے سفارش کی گئی-
 

یہ نابینا جج ان 21 سول ججوں میں شامل تھے جنہوں نے منگل کے روز سول جج کے عہدے کے لیے حلف اٹھایا-

حلف برداری کی اس تقریب سے خطاب کرتے ہوئے لاہور ہائی کورٹ کے چیف جسٹس محمد یاور علی کا کہنا تھا کہ “ سول جج کو اپنے تمام فرائض بھرپور انداز میں سرانجام دینے چاہئیں“-

“ انصاف قانونی دائرے میں رہتے ہوئے بلا کسی خوف و خطر کے مہیا کیا جانا چاہیے“-

نابینا جج سلیم یوسف پنجاب حکومت کے ڈپارٹمنٹ میں بطورِ اسسٹنٹ ڈائریکٹر (لیگل) اپنی خدمات سرانجام دے رہے تھے- اور یہ ان 300 افراد میں شامل تھے جنہوں نے سول جج کی پوزیشن کے تحریری امتحان دیا- اس امتحان میں یوسف سلیم سمیت 21 درخواست گزار کامیاب ہوئے-
 

تاہم ان کی معذوری ان کے راستے میں رکاوٹ بن گئی اور انٹرویو کے مرحلے وقت انہیں مسترد کردیا گیا-

جس کے بعد چیف جسٹس آف پاکستان نے براہ راست چیف جسٹس آف لاہور ہائی کورٹ کو اس معاملے کا جائزہ لینے کی ہدایت کی- ایک شخص نابینا ہونے کے باوجود جج بن سکتا ہے جب اس میں عہدے کے لیے پوری قابلیت موجود ہو-

بالاخر 12 مئی کو یوسف سلیم کو لاہور ہائی کورٹ کی جانب سے ایک خط کے ذریعے سول جج کم مجسٹریٹ کے عہدے کے حوالے سے خوشخبری سنائی گئی-

یوسف سلیم جو کہ ایک چارٹرڈ اکاؤنٹنٹ کے بیٹے ہیں٬ پیدائشی طور پر نابینا ہیں- ان کی چار بہنیں ہیں جن میں سے دو بہنیں بھی نابینا ہیں-