صرف قادیانی ہی زیرِ اعتاب کیوں!

عاطف رحمان میاں ایک پاکستانی نژاد امریکی ماہر اقتصادیات ہیں۔ 2014ء میں بین الاقوامی مالیاتی فنڈ (آئی ایم ایف) نے عاطف میاں کو دنیا کے پچیس بہترین نوجوان ماہرین اقتصادیات میں شمار کیا ہے۔ حکومت کی جانب سے احمدیہ جماعت سے تعلق رکھنے والے ماہر اقتصادیات عاطف میاں کو اقتصادی مشاورت کونسل میں شامل کیا گیا تھا جس پر بعض سیاسی جماعتوں اور سوشل میڈیا پر شدید تنقید کی گئی تھی، وفاقی وزیر اطلاعات فواد چوہدری کا کہنا ہے کہ حکومت نے عاطف میاں کی اقتصادی مشاورتی کمیٹی سے نامزدگی واپس لینے کا فیصلہ کیا ہے، سینیٹر فیصل جاوید نے کہا ہےکہ عاطف میاں کے متبادل کا اعلان جلد کیا جائے گا۔

عاطف رحمان میاں کے مخالفین مرزائیوں کو ایمان کے ڈاکو قرار دیتے ہیں اور یہ تو ہم جانتے ہی ہیں کہ ہمارے ہاں ڈاکو راج ہے، جس کی لاٹھی ہے اسی کی بھینس ہے، چنانچہ ڈاکو کو ڈاکو کہنا ہی مشکل ہوگیا ہے، بلکہ بعض ڈاکو تو مجاہد بھائی کہلاتے ہیں۔ ہمارے ہاں کے یہ مجاہد بھائی لوگوں کو اغوا کرتے ہیں، پبلک مقامات پر خود کش دھماکے کرتےہیں، مساجد ہوں یا مندر یا کوئی چرچ وہاں دہشت گردی کی واردادتیں کرتے ہیں ، سکولوں میں کم سن بچوں پر شبخون مارتے ہیں لیکن اس کے باوجودوہ مرزائیوں کی طرح ڈنکے کی چوٹ پر کہتے ہیں کہ وہ ختم نبوت پر یقین رکھتے ہیں اور عاشقِ رسولﷺ ہیں وغیرہ وغیرہ۔

کسی میں یہ جرات نہیں کہ وہ کسی مجاہد بھائی سے پوچھے کہ ختم نبوت پر یقین کا تقاضا تو یہ ہے کہ تم ختمی المرتبت ﷺ کی امت پر رحم کرو اور چھوٹے بچوں سے شفقت کے ساتھ پیش آو لیکن تم تو امت مسلمہ پر ظلم کرتے ہو اورچھوٹے بچوں کو خاک و خوں میں غلطاں کرتے ہو ، تمہارے کرتوت تو ختم نبوت کے پیغام کے سراسر خلاف ہیں۔

قادیانیوں کی طرح یہ مجاہد بھائی بھی اپنے آپ کو ختم نبوت کا منکر نہیں کہنے دیتے لیکن عملاً امت مسلمہ کے بدترین دشمن ہیں، چونکہ پاکستان آرمی جہان اسلام کی بہترین فوج ہے اور پاکستانی قوم ایک باوقار مسلمان قوم ہے لہذا یہ لوگ پاکستانی فوج اور قوم سے بدترین بغض رکھتے ہیں، یہ پاکستان فوج کو ناپاک فوج کہتے ہیں، پاکستانی فوجیوں کے سروں سے فٹبال کھیلتےہیں، پاکستانی جوانوں کو موقع ملتے ہی جانوروں کی طرح ذبح کرتے ہیں، پاکستانی پولیس اور ایف سی کی تاک میں لگے رہتے ہیں پاکستانی عبادتگاہوں میں خود کش دھماکے کرتے ہیں، اب تک انہوں نے پاکستان کو بہترین اور قیمتی دماغوں سے محروم کیا، ملک و قوم کا سرمایہ سمجھے جانے والے پولیس اور فوج کے جوانوں کو موت کے گھاٹ اتارا، سعید چشتی جیسے قوال کو گولیوں سے بھون ڈالا، آرمی پبلک سکول میں ننھی منھی کلیوں کو مسل ڈالا اور بچوں کے سامنے اساتذہ کو زندہ آگ لگا دی، محبت کے مراکز داتا دربار سے بری امام تک انہوں نے متعدد اولیائے کرام کے مزارات پر خود کش دھماکے کئے ، مکر وفریب کے ان پتلوں نے ایک فرقے کو بدنام کرنے کے لئے راجہ بازار راولپنڈی میں خود ہی اپنے مدرسے کو آگ لگائی اور اپنے مسلک کے لوگوں کو قتل کیا لیکن اس کے باوجود ان کا دعویٰ ہے کہ یہ ختم نبوت کے علمبردار ہیں۔

ان کا عمل اس بات پر گواہ ہے کہ یہ بھی قادیانیوں کی طرح جھوٹ بھول رہے ہیں اور ختم نبوت کے عقیدے کو بغل میں چھری اور منہ میں رام رام کے طور پر استعمال کر رہے ہیں۔

یہ لہو سے دھلا ہوا پاکستان ، اہلیانِ پاکستان سے یہ اپیل کرتا ہے کہ ختم نبوت کے جھوٹے نعرے لگانے والوں کو بے نقاب کیا جائے اور جس طرح مرزائیوں کو پاکستان میں کوئی کلیدی عہدہ نہیں ملنا چاہیے اسی طرح ختم نبوت کے ان جھوٹے ٹھیکیداروں کو بھی پاکستان میں کسی اہم پوسٹ پر تعینات نہیں کیا جانا چاہیے۔
عدل و انصاف کا تقاضا ہے کہ پاکستان کے ان دشمنوں کے خلاف، مرزائیوں کی طرح فوری کارروائی کی جائے اور ان کے ہم مشرب و ہم عقیدہ لوگوں کو جلد از جلد بنیادی پوسٹوں سے ہٹایا جائے۔