|
نیوزی لینڈ اور بھارت کے درمیان کھیلے گئے ون ڈے میچ میں کرکٹ کی تاریخ کا
انوکھا واقعہ پیش آیا ہے۔ تفصیلات کے مطابق نیوزی لینڈ کے شہر نیپیر کے مک
لین پارک میں جاری سیریز کے پہلے ون ڈے کے دوران کرکٹ کی تاریخ کا انوکھا
واقعہ پیش آیا جہاں نیوزی لینڈ کی بیٹنگ کے بعد بھارتی ٹیم ہدف کا تعاقب
کرنے کے لیے میدان میں اتری تو 10 اوورز کے بعد اسے ایک مرتبہ پھر وقفہ
کرنا پڑگیا۔
|
|
|
اب تک کے مطابق یہ وقفہ قانون کے مطابق نہیں بلکہ خلاف توقع تھا جو میچ کے
دوران غروب آفتاب کے وقت کرنا پڑا۔ نیپیر کے مک لین پارک میں غروب آفتاب
کے دوران سورج کی کرنیں سیدھی بیٹسمین کے چہرے پر پڑ رہی تھیں جس کی وجہ سے
بھارتی کھلاڑیوں نے کھیلنے سے انکار کردیا اور میچ تقریباً آدھے گھنٹے سے
زائد تعطل کا شکار رہا تاہم سورج کے ڈوبنے کے بعد میچ کو مصنوعی روشنی میں
دوبارہ شروع کیا گیا۔
واضح رہے کہ کرکٹ کے میدان میں پچ کی سمت شمال اور جنوب کی جانب ہوتی ہے،
تاہم مک لین پارک میں بنائی گئی پچ کی سمت مشرق اور مغرب کی جانب ہے۔بھارتی
کرکٹ ٹیم آسٹریلیا کا دورہ مکمل کر کے اس وقت نیوزی لینڈ میں موجود ہے
جہاں دونوں ٹیموں کے درمیان پانچ ون ڈے اور تین ٹی ٹوئنٹی میچز پر مشتمل
سیریز کھیلی جائے گی- |